Denmark Greenland Warn USA : ગ્રીનલેન્ડ પર નજર જમાવીને બેઠેલા અમેરિકાને ડેનમાર્કે અત્યંત કડક શબ્દોમાં ચેતવણી આપી છે. ડેનમાર્કના રક્ષા મંત્રાલયે સ્પષ્ટ કહ્યું છે કે, "અમે સવાલ પૂછતા પહેલા ગોળી મારીશું." આ આકરું નિવેદન એવા સમયે આવ્યું છે જ્યારે અમેરિકન પ્રમુખ ડોનાલ્ડ ટ્રમ્પ ગ્રીનલેન્ડને હાંસલ કરવા માટે સૈન્ય બળના ઉપયોગને પણ એક વિકલ્પ તરીકે જોઈ રહ્યા છે.
ડેનમાર્કની ખુલ્લી ધમકી
મીડિયા રિપોર્ટ્સ અનુસાર, ડેનમાર્કના રક્ષા મંત્રાલયે કહ્યું છે કે જો અમેરિકા ગ્રીનલેન્ડ પર આક્રમણ કરશે, તો અમે પહેલા ગોળી ચલાવીશું અને પછી સવાલ પૂછીશું. ખાસ વાત એ છે કે, 1952ના સૈન્ય નિયમો હેઠળ, ડેનમાર્કના સૈનિકોને ઉચ્ચ અધિકારીઓના આદેશ વિના પણ આક્રમણખોરો પર હુમલો કરવાનો અધિકાર છે.
અમેરિકાનો પ્લાન અને વ્હાઇટ હાઉસની પુષ્ટિ
વ્હાઇટ હાઉસે મંગળવારે કહ્યું કે પ્રમુખ ટ્રમ્પ ગ્રીનલેન્ડને મેળવવાના વિકલ્પો પર વિચાર કરી રહ્યા છે અને આ લક્ષ્ય માટે અમેરિકન સેનાનો ઉપયોગ પણ તેમના વિકલ્પોમાં સામેલ છે. નિવેદનમાં કહેવાયું છે કે ટ્રમ્પ ગ્રીનલેન્ડને આર્કટિક ક્ષેત્રમાં અમેરિકાની રાષ્ટ્રીય સુરક્ષા માટે મહત્વપૂર્ણ માને છે અને તેને રશિયા તથા ચીન જેવી શક્તિઓને રોકવા સાથે જોડીને જુએ છે. વ્હાઇટ હાઉસના પ્રેસ સેક્રેટરી કેરોલિન લેવિટે કહ્યું, "ટ્રમ્પે પહેલા જ સ્પષ્ટ કરી દીધું છે કે આર્કટિક ક્ષેત્રમાં વિરોધી શક્તિઓને રોકવા માટે ગ્રીનલેન્ડ અમેરિકા માટે વ્યૂહાત્મક રીતે અત્યંત મહત્વપૂર્ણ છે."
યુરોપ અને કેનેડા ડેનમાર્કના સમર્થનમાં
અમેરિકાના આ વલણ સામે યુરોપના ઘણા દેશોએ સંયુક્ત નિવેદન જારી કરીને કડક વિરોધ નોંધાવ્યો છે. ફ્રાન્સ, જર્મની, ઇટાલી, પોલેન્ડ, સ્પેન અને બ્રિટન સહિત ડેનમાર્કે કહ્યું છે કે, "ગ્રીનલેન્ડ અહીંના લોકોનું છે અને તેનો નિર્ણય ફક્ત અહીંના લોકો જ કરશે." કેનેડાના વડાપ્રધાન માર્ક કાર્નીએ પણ ડેનમાર્કને સમર્થન આપતા કહ્યું છે કે ગ્રીનલેન્ડના ભવિષ્યનો નિર્ણય માત્ર ડેનમાર્ક અને ત્યાંના લોકો જ કરશે.
વાતચીતનો પ્રયાસ અને અમેરિકાનું નરમ વલણ?
આ તણાવ વચ્ચે, ડેનમાર્કના વિદેશ મંત્રી લાર્સ લોક્કે રાસમુસેને કહ્યું કે આ મુદ્દે ગેરસમજ દૂર કરવા માટે અમેરિકન વિદેશ મંત્રી માર્કો રુબિયો સાથે બેઠકની માંગ કરવામાં આવી છે. દરમિયાન, વિદેશ મંત્રી માર્કો રુબિયોએ કોંગ્રેસને આપેલી બ્રીફિંગમાં સૈન્ય કાર્યવાહીની વાતને થોડી હળવી કરતા સંકેત આપ્યા છે કે તાત્કાલિક કોઈ સૈન્ય હસ્તક્ષેપની યોજના નથી અને મુખ્ય ઉદ્દેશ્ય ડેનમાર્ક પાસેથી ગ્રીનલેન્ડને "ખરીદવા" પર કેન્દ્રિત છે.
