ટ્રમ્પને કોર્ટની વધુ એક લપડાક, શટડાઉન વચ્ચે સરકારી કર્મચારીઓની છટણી નહીં કરી શકે

US Court Decision: અમેરિકામાં ચાલી રહેલા સરકારી શટડાઉન (Government Shutdown) વચ્ચે ટ્રમ્પ પ્રશાસનને મોટો કાનૂની ફટકો પડ્યો છે. સાન ફ્રાન્સિસ્કોના ફેડરલ જજ સુસાન ઈલ્સ્ટનએ હજારો ફેડરલ કર્મચારીઓને છૂટા કરવાના વહીવટીતંત્રના નિર્ણય પર અસ્થાયી રૂપે રોક લગાવી દીધી છે.

આ આદેશ શટડાઉન દરમિયાન કર્મચારીઓની છટણી ગેરકાયદે હોવાનો દાવો કરીને લેબર યુનિયનો દ્વારા દાખલ કરાયેલા મુકદ્દમાના જવાબમાં આવ્યો છે. વ્હાઇટ હાઉસ દ્વારા ઓછામાં ઓછા 10,000 કર્મચારીઓને રજા પર (ફર્લો) મોકલવાની યોજના જાહેર કર્યાં પછી આ કાનૂની પગલું લેવામાં આવ્યું હતું.

શટડાઉન દરમિયાન કોઈ નિયમો લાગુ નથી પડતા?

સુનાવણી દરમિયાન જજ ઇલ્સ્ટને ટ્રમ્પ પ્રશાસન પર ગંભીર સવાલો ઉઠાવ્યા હતા. તેમણે ચિંતા વ્યક્ત કરી હતી કે વ્હાઇટ હાઉસની ઑફિસ ઑફ મેનેજમેન્ટ એન્ડ બજેટ (OMB) અને ઑફિસ ઑફ પર્સનલ મેનેજમેન્ટ (OPM) કાયદાની અવગણના કરવા માટે શટડાઉનનો લાભ લઈ રહ્યાં છે. ન્યાયાધીશ ઇલ્સ્ટને ટકોર કરી હતી કે, 'સરકારે એવું માની લીધું હોય તેવું લાગે છે કે શટડાઉન દરમિયાન કોઈ નિયમો લાગુ પડતા નથી.'

ટ્રમ્પ પ્રશાસનનો આક્રમક વલણ

બીજી તરફ વ્હાઇટ હાઉસના ઑફિસ ઑફ મેનેજમેન્ટ એન્ડ બજેટ (OMB)ના વડા રસ વોટએ જણાવ્યું હતું કે, 'અમે 10,000થી વધુ કર્મચારીઓને છૂટા કરીશું. અમે અમલદારશાહી ઘટાડવા માટે ખૂબ જ આક્રમક બનવા માંગીએ છીએ.'

અમેરિકાના પ્રમુખ ડોનાલ્ડ ટ્રમ્પએ અગાઉ ચેતવણી આપી હતી કે જો ડેમોક્રેટ્સ નવેમ્બરના અંત સુધીમાં સરકારને ભંડોળ પૂરું પાડવાના પ્રસ્તાવને સમર્થન નહીં આપે, તો તેઓ મોટા પાયે છટણી શરૂ કરશે. તેમણે ખાસ કરીને ડેમોક્રેટ્સ સાથે જોડાયેલા માનવામાં આવતા કામદારોને લક્ષ્ય બનાવવાની વાત કહી હતી.

કર્મચારીઓના અધિકારોનું ઉલ્લંઘન

લેબર યુનિયનો દલીલ કરી રહ્યા છે કે આ છટણીઓ માત્ર ગેરકાયદે જ નથી, પરંતુ લાખો સરકારી કર્મચારીઓના અધિકારોનું પણ ઉલ્લંઘન કરે છે. જજ ઇલ્સ્ટનનો આ આદેશ ટ્રમ્પ વહીવટીતંત્ર માટે એક મોટો ફટકો છે, જે શટડાઉનનો ઉપયોગ કરીને તેમની નીતિઓ લાગુ કરવા માંગતું હતું.

આ શટડાઉનના કારણે લાખો સરકારી કર્મચારીઓ પગાર વગર અથવા ઘરે બેઠા હોવાથી આર્થિક મુશ્કેલીનો સામનો કરી રહ્યા છે, જ્યારે ટ્રમ્પ અને ડેમોક્રેટ્સ વચ્ચેની રાજકીય ખેંચતાણ પરિસ્થિતિને વધુ જટિલ બનાવી રહી છે.