- યુટામાં યુનિ.ના કાર્યક્રમમાં ભાષણ આપતી વખતે ઘટના બની
- ટ્રમ્પે હિંસાને રાજકીય હિંસા ગણાવી અને તેના માટે ડાબેરી આતંકવાદી તત્વોને જવાબદાર ઠેરવ્યા
વોશિંગ્ટન : ટ્રમ્પના ગાઢ સહયોગી ચાર્લસ કર્કની ગોળી મારીને હત્યા કરવામાં આવી છે. કન્ઝર્વેટિવ યુથ ગુ્રપ ટર્નિંગ પોઇન્ટ યુએસએના સીઇઓ અને સહસ્થાપક ચાર્લી કર્કની બુધવારે યુટા વેલી યુનિ.માં એક ડિબેન્ટ ઇવેન્ટ દરમિયાન ગોળી મારી હત્યા કરાઈ હતી.
ચાર્લી પ્રમુખ ટ્રમ્પના ગાઢ સહયોગી હતા. ટ્રમ્પે પોતે સોશિયલ મીડિયા પર પોસ્ટ કરી તેના મૃત્યુની જાણકારી આપી. ટ્રમ્પે ચાર્લીના સન્માનમાં દેશના બધા રાષ્ટ્રધ્વજને અડધી કાઠીએ ફરકાવવાનો આદેશ આપ્યો છે. કર્કને ગોળી ત્યારે મારવામાં આવી જ્યારે તે ટર્નિંગ પોઇન્ટ તરફથી આયોજિત એક ડિબેટમાં બોલી રહ્યા હતા. તેને ગોળી વાગ્યા પછી ગંભીર હાલતમાં હોસ્પિટલમાં દાખલ કરવામાં આવ્યો હતો. અધિકારીઓના જણાવ્યા મુજબ એક શંકાસ્પદ પકડવામાં આવ્યો છે, પરંતુ હજી સુધી તેની ઓળખ કરવામાં આવી નથી.
ઉલ્લેખનીય છે કે આ યુનિવર્સિટીમાં કર્કની હાજરીનો ઘણાએ વિરોધ કર્યો હતો. યુનિવર્સિટી વહીવટીતંત્ર તેનો કાર્યક્રમ રદ કરે તેવા અભિયાન પર એક હજાર લોકોએ સહી કરી હતી. પણ યુનિવર્સિટીએ છેલ્લા સપ્તાહે સ્પષ્ટ કરી દીધું હતું કે આ કાર્યક્રમ રદ કરી શકાય તેવો નથી, કેમકે પહેલા સંશોધન હેઠળ મુક્ત અભિવ્યક્તિ અને સંવાદ આઝાદી સાથે જોડાયેલો મામલો છે.
ચાર્લીના મોતની જાણકારી આપતાં ટ્રમ્પે લખ્યું હતું કે ગ્રેટ અને લીજેન્ડરે ચાર્લી આ વિશ્વમાં રહ્યા નથી. અમેરિકન યુવાનોને તેમનાથી સારી રીતે કોઈ સમજી શક્યું નથી. ચાર્લી જેવું દિલ અને દિમાગ કોઈની પાસે ન હતું. હું અને મેલનિયા તેમની પત્ની એરિકા અને આખા કુટુંબ પ્રત્યે સંવેદનાની લાગણી વ્યક્ત કરીએ છીએ. ટ્રમ્પે તેને સત્યના માટે શહાદત વહોરનાર ગણાવ્યો હતો અને આખા દેશના રાષ્ટ્રધ્વજને અડધી કાઠીએ ફરકાવવા આદેશ આપ્યો હતો.
ટ્રમ્પે આ હુમલાને રાજકીય હુમલો ગણાવ્યો હતો. તેણે આ હુમલા માટે ઉદ્દામવાદી ડાબેરી તત્વોને જવાબદાર ગણાવ્યા હતા. આ હુમલાખોર હજી પણ ઝડપાયો નથી. તેણે ઘણા દૂરથી આ હુમલો કર્યો હતો અને છતાં પણ તે સફળ રહ્યો હતો. પોલીસ આ હુમલાખોરના સગડ હજી સુધી મેળવી શકી નથી. ગોળી વાગતા ચાર્લી તરત જ લોહીના ખાબોચિયામાં ઢળી પડેલો જોવા મળ્યો હતો.
આશ્ચર્યની વાત એ હતી કે ચાર્લી કર્કે આ પહેલા એરિઝોનામાં અમેરિકામાં ગન વાયોલન્સ વધી રહી છે તેના પર ભાષણ આપ્યું હતું. તેણે લોકોના સવાલોના જવાબમાં જણાવ્યું હતું કે વધતી જતી આ હિસામાં ટ્રાન્સજેન્ડરોની સંડોવણી મોટાપાયા પર છે. આમ તેના પછીની ડિબેટમાં જ તેને ગોળી મારી દેવાઈ હતી.
કર્કે માર્ટિન લ્યુથર કિંગની પણ ટીકા કરી હતી
ગન વાયોલન્સથી લઈને ચાઇના વાઇરસઃકર્કના વિવાદાસ્પદ નિવેદનો
- અમેરિકનો પાસે બંદૂક રાખવાના હિમાયતીની ગોળીબારમાં જ હત્યા કરાઈ
વોશિંગ્ટન : અમેરિકાની યુટા યુનિવર્સિટીમાં ગોળીબારમાં મૃત્યુ પામેલો ૩૧ વર્ષનો ચાર્લી કર્ક ટ્રમ્પના ગાઢ સહયોગી તરીકે જાણીતો છે. જમણેરી પાખનું જાણીતું નામ ચાર્લી કર્કે ગન વાયોલસન્થી લઈને ચાઇના વાઇરસ સુધી વિવાદાસ્પદ નિવેદનો કર્યા હતા.
ચાર્લીએ ગન કંટ્રોલ અંગે જણાવ્યું હતું કે અમેરિકાના બંધારણમાં જ તેનો અધિકાર આપવામાં આવ્યો છે. તેના હેઠળ અમેરિકનો સ્વરક્ષણ માટે શસ્ત્રો રાખી શકે છે. ગન વાયોલન્સથી થતાં મોત અંગે તેણે જણાવ્યું હતું કે આ બીજું કશું નહીં પણ અમેરિકનો દ્વારા ગન રાખવાની ચૂકવાતી કિંમત છે. આશ્ચર્યની વાત એ છે કે તેનું મોત પણ ગન વાયોલન્સથી જ થયું હતું. કર્કે આ ઉપરાંત સિવિલ રાઇટ્સને લઈને નાગરિક અધિકારોના સંદર્ભમાં માર્ટિન લ્યુથર કિંગની પણ ટીકા કરી હતી. તેણે જણાવ્યું હતું કે માર્ટિન લ્યુથર કિંગ બતાવાય છે તેટલા સારા વ્યક્તિ ન હતા. તેમને વધુ પડતું મહત્ત્વ આપવામાં આવી રહ્યું છે. તેણે સિવિલ રાઇટ્સ એક્ટ ૧૯૬૫ને અમેરિકન બંધારણની સૌથી મોટી ભૂલ ગણાવ્યો હતો. આમ તે શ્વેત રાષ્ટ્રવાદનું પ્રતિનિધિત્વ કરતો હતો.
આ ઉપરાંત કોરોના વાઇરસ ત્રાટક્યો ત્યારે ચાર્લી કર્કે કોરોના નહીં પણ ચાઇના વાઇરસ શબ્દ તરતો મૂક્યો હતો, જેને પછી ટ્રમ્પે ઉપાડી લીધો હતો.આ ઉપરાંત તેણે ઇમિગ્રન્ટ્સ અંગે પણ વિવાદાસ્પદ ટિપ્પણીઓ કરી હતી અને તે મૂળ અમેરિકનોની નોકરીઓ લઈ રહ્યા હોવાનું જણાવ્યું હતું.
