ધ્રાંગધ્રા હાઈવે પર ચુલી નજીક બેભાન હાલતમાં યુવાન મળ્યો

યુવાનને વાહને અડફેટે લીધો હોવાની આશંકા

સારવાર દરમિયાન શંકાસ્પદ મોત, ઓળખ માટે પોલીસની તજવીજ

ધ્રાંગધ્રા -  ધ્રાંગધ્રા હાઇવે પર ચુલી ગામ પાસેથી મોડી રાત્રે એક યુવક બેભાન હાલતમાં મળી આવ્યો હતો. જેને સારવાર અર્થે હોસ્પિટલ ખસેડવામાં આવતા સારવાર દરમિયાન મોત નિપજ્યું હતું.

ધ્રાંગધ્રા હાઈવે પર ચુલી ગામ પાસે રવિવારે મોડી રાત્રે એક યુવાન બેભાન હાલતમાં પડયો હોવાની જાણ થતા આસપાસથી પસાર થતા વાહન ચાલકો સહિત લોકોના ટોળા ઘટના સ્થળે ઉમટી પડયા હતા અને બેભાન યુવાનને તાત્કાલિક હોસ્પિટલ ખાતે એમ્બ્યુલન્સ મારફતે લઈ જવામાં આવ્યો હતો જ્યાં યુવાનનું સારવાર દરમિયાન મોત થયું હતું. જે અંગે ધ્રાંગધ્રા તાલુકા પોલીસે હાલ અકસ્માતે મોતનો ગુનો નોંધી તપાસ હાથ ધરી છે. ધ્રાંગધ્રા હાઈવે પર બેભાન હાલતમાં મળી આવેલ અજાણ્યા યુવાનના પીઠના ભાગે ઈજાઓ પણ હતી સાથે જ કોઈ અજાણ્યા વાહને યુવાનને અડફેટે લીધો હોવાનું સ્થાનિક પોલીસે પ્રાથમિક અનુમાન કરી યુવાનના મૃતદેહને પીએમ અર્થે હોસ્પિટલ ખસેડી ઓળખ અંગે વધુ તપાસ હાથ ધરી છે.