સયાજીગંજ ભવાની નગર ચકલા પાસે યુવકના માથામાં લોખંડની કોશના ઉપરાછાપરી ફટકા મારી ઘાતકી હત્યા

વડોદરા,સયાજીગંજ વિસ્તારમાં સાંજે પાંચ વાગ્યે નજીવી બાબતે તકરાર થતા ઉશ્કેરાયેલા હુમલાખોરે લોખંડની કોશના ઉપરાછાપરી ઘા મારતા ઇજાગ્રસ્ત યુવાન  ઢળી પડયો હતો. પોલીસે મર્ડરનો ગુનો દાખલ કરી કાયદેસરની કાર્યવાહી હાથ ધરી છે.

સયાજીગંજ રેલવે લાઇન મહારાજા નગર ભવાની નગરમાં રહેતા ૩૦ વર્ષના અજય રાજુભાઇ શિંદે આજે સાંજે પાંચ વાગ્યે ભવાની નગર ચકલા પાસે મિત્રો સાથે ઉભો હતો. તે દરમિયાન આરોપી રાહુલ ખેડેકર આવ્યો હતો. રાહુલ ખેડેકર અને જયેશ સોનાર વચ્ચે કોઇ બાબતે ઝઘડો થયો હતો. આ ઝઘડો ઉગ્ર સ્વરૃપ ધારણ ના કરી લે તે માટે અજય છોડાવવા વચ્ચે પડયો હતો. જેથી, ઉશ્કેરાયેલા  રાહુલ ખેડેકરે લોખંડની કોશ વડે અજય પર હુમલો કર્યો હતો.  દરમિયાન જયેશ સ્થળ પરથી  ભાગી ગયો હતો. જ્યારે રાહુલે અજયના  માથામાં ઉપરાછાપરી  ફટકા મારતા તે લોહીલુહાણ હાલતમાં ઢળી  પડયો હતો. તેના અન્ય મિત્રો છોડાવવા વચ્ચે પડતા વિકાસ મોરે નામના યુવકને પણ ઇજા થઇ હતી. ત્યારબાદ હુમલાખોર ભાગી ગયો હતો.  ઇજાગ્રસ્ત અજયને તેનો ભાઇ દિપક શિંદે સારવાર માટે સયાજી હોસ્પિટલમાં લઇ આવ્યો હતો. પરંતુ, તેનો જીવ બચી શક્યો નહતો. બનાવના પગલે સયાજી હોસ્પિટલમાં લોકોના ટોળા ઉમટી  પડયા હતા. આ  અંગે સયાજીગંજ પોલીસને જાણ કરવામાં આવતા પોલીસે ગુનો દાખલ કરી વધુ તપાસ  હાથ ધરી છે. 

મૃતકને એટલા ફટકા માર્યા કે ચહેરો છુંદાઇ ગયો

વડોદરા,

 આ હુમલામાં ઇજાગ્રસ્ત યુવકે જણાવ્યું હતું કે, બોલાચાલી દરમિયાન રાહુલે અજયના પરિવારને ગાળો બોલતા અજયે તેને ગાળો બોલવાની ના પાડી હતી. અમે પણ રાહુલને સમજાવવાનો પ્રયાસ કરતા હતા. પરંતુ, ઉશ્કેરાયેલા રાહુલે ઘાતક  હુમલો કરી દીધો હતો. તેણે અસંખ્યા ઘા ઝીંકી દેતા અજયનો ચહેરો છુંદાઇ ગયો હતો.

એમ્બ્યુલન્સ નહીં આવતા રિક્ષામાં ઇજાગ્રસ્તને લઇ  જવાયો

 વડોદરા,

મૃતકની માતાએ આક્ષેપ કર્યો હતો કે, મારો પુત્ર લોહીલુહાણ હાલતમાં ઢળી પડયો હતો. ત્યાં હાજર લોકોએ ૧૦૮ ને કોલ કરી એમ્બ્યુલન્સ બોલાવી હતી. પરંતુ, એમ્બ્યુલન્સ મોડી પડતા મારા પુત્રને લોહીલુહાણ હાલતમાં રિક્ષામાં સયાજી હોસ્પિટલમાં લઇ જવામાં આવ્યો હતો. આરોપીને ઝડપી પાડી ફાંસીની સજા કરવામાં આવે.