અપ ટુ ડેટ મહિલાએ જ્વેલર્સ શોરૂમમાંથી દાગીના સેરવી મોઢામાં મૂકી દીધા, માનસિક અસ્વસ્થ હોવાથી છોડી દીધી

Vadodara : વડોદરાના રેસકોર્સ વિસ્તારમાં આવેલા એક જ્વેલર્સને ત્યાં અપટુડેટ મહિલા દાગીના ચોરતા રંગે હાથ પકડાઈ જતા તેણે પગમાં પડીને માફી માગી હતી. મહિલા માનસિક અસ્વસ્થ હોવાથી સંચાલકોએ તેને જવા દીધી હતી.

રેસકોર્સ વિસ્તારના નામાંકિત જ્વેલર્સ શોરૂમમાં બની ઠનીને આવેલી મહિલાએ એક પછી એક દાગીના કઢાવ્યા હતા પરંતુ ખરીદી કરી ન હતી. દાગીનાની ગણતરી દરમિયાન મહિલા કર્મચારીને શંકા જતા તેણે મેનેજરને બુટ્ટી અને વીંટી નહીં હોવાની જાણ કરી હતી. જેથી મેનેજર સીસીટીવી ફૂટેજ ચેક કર્યા હતા. કીંમતી વસ્ત્રો અને મોર્ડન હેર સ્ટાઈલ કરીને આવેલી મહિલાની પૂછપરછ કરતા બોલવામાં તકલીફ થવા માંડી હતી અને તે દરમિયાન મોઢામાંથી વીંટી અને બુટ્ટી મળી આવ્યા હતા. 

સંચાલકે પોલીસને બોલાવતા મહિલા ગભરાઈ હતી અને પગમાં પડીને માફી માંગી હતી. મહિલાનો પતિ પણ આવી ગયો હતો અને તેણે મેડિકલ સારવારના કાગળો રજૂ કરી મહિલા માનસિક અસ્વસ્થ હોવાનું જણાવતા પોલીસે ખાતરી કર્યા બાદ તેને જવા દીધી હતી. સંચાલકોએ પણ તેમના દાગીના પરત મળી ગયા હોવાથી ફરિયાદ કરવાનું ટાળ્યું હતું.