જામનગર: ડિફેન્સ કોલોનીમાં મહિલાની કરપીણ હત્યા, અનૈતિક સંબંધો અને બ્લેકમેલિંગે જીવ લીધો હોવાની આશંકા
Summarized by AI; it may make mistakes. Check important info
Summarized by AI; it may make mistakes. Check important info
Jamnagar Crime News: જામનગર શહેરમાં રામનવમીના પવિત્ર દિવસે જ હત્યાની એક સનસનીખેજ ઘટના સામે આવતા ચકચાર મચી ગઈ છે. ડિફેન્સ કોલોની વિસ્તારમાં રહેતી 40 વર્ષીય પરપ્રાંતિય મહિલાનો ગળે ટૂંપો દીધેલી હાલતમાં મૃતદેહ મળી આવ્યો છે. ચોંકાવનારી વિગત એ છે કે, આ હત્યા અન્ય કોઈએ નહીં પણ મહિલાના પુત્રના જ મિત્રએ અનૈતિક સંબંધો અને પૈસાની ઉઘરાણીના વિવાદમાં કરી હોવાનું પોલીસ તપાસમાં સામે આવ્યું છે.
મહિલાનો મૃતદેહ આરોપીના કાકાના ઘરેથી મળ્યો
મળતી માહિતી અનુસાર, મૂળ મથુરાની વતની અને જામનગરના ડિફેન્સ કોલોનીમાં રહેતી રીન્કી દેવી કઠેરીયા 23મી માર્ચથી ગુમ હતી. તેના પુત્ર રોહિતે આ અંગે સીટી સી-ડિવિઝન પોલીસ મથકમાં જાણ કરી હતી અને પરિવાર તેની શોધખોળ કરી રહ્યો હતો. આ દરમિયાન, આજે (26 માર્ચ) સવારે પાડોશમાં રહેતા અને રોહિતના મિત્ર એવા વિજય ઓડિચના કાકાના બંધ મકાનમાંથી રીન્કી દેવીનો મૃતદેહ મળી આવતા દોડધામ મચી ગઈ હતી.
હત્યા પાછળનું કારણ અનૈતિક સંબંધો અને બ્લેકમેલિંગ!
પોલીસની પ્રાથમિક તપાસમાં સામે આવ્યું છે કે, મૃતક રીન્કી દેવીના પતિનું 2021માં અવસાન થયું હતું. તેના ત્રણ સંતાનો સાથે રહી કારખાનામાં મજૂરી કરી ગુજરાન ચલાવતી હતી. આ દરમિયાન પાડોશમાં રહેતા વિજય ઓડિચ સાથે તેના પરિચય વધ્યો હતો. વિજય તેના પુત્ર રોહિતનો મિત્ર હોવાથી ઘરે અવરજવર ધરાવતો હતો. બંને વચ્ચેના અનૈતિક સંબંધો બાદ રીન્કી દેવી વિજય પાસે પૈસાની માંગણી કરતી હતી અને પોલીસ ફરિયાદ કરવાની ચીમકી આપતી હતી. આ બ્લેકમેલિંગથી છુટકારો મેળવવા વિજયે 23મી માર્ચના રોજ રીન્કીને તેના કાકાના ઘરે બોલાવી હતી અને ત્યાં ગળે ટૂંપો દઈ તેની હત્યા કરી નાખી હતી.
હત્યારો પુત્ર સાથે તેની માતાને શોધવાનું નાટક કરતો રહ્યો
આ કેસમાં સૌથી કરૂણ પાસું એ છે કે, રીન્કીની હત્યા કર્યા બાદ આરોપી વિજયે મૃતદેહને ઘરમાં જ સંતાડી દીધો હતો. એટલું જ નહીં, તે રીન્કીના પુત્ર રોહિતની સાથે રહીને તેની માતાને શોધવામાં મદદ કરવાનું નાટક પણ કરતો રહ્યો હતો જેથી તેના પર કોઈને શંકા ન જાય. પરંતુ આજે સવારે મકાનમાંથી દુર્ગંધ આવતાં મામલો પોલીસ મથક સુધી પહોંચ્યો હતો, અને પોલીસે તપાસ કરતાં એક કોથળામાં રીન્કી દેવીનો મૃતદેહ સંતાડેલો મળી આવ્યો હતો.
સીટી સી-ડિવિઝન પોલીસની ટીમે ઘટનાસ્થળે પહોંચી મૃતદેહનો કબજો મેળવી જી.જી. હોસ્પિટલમાં પોસ્ટમોર્ટમ કરાવ્યું છે. મૃતકના પુત્ર રોહિતની ફરિયાદના આધારે પોલીસે આરોપી વિજય ઓડિચ સામે હત્યાનો ગુનો નોંધી તેની અટકાયત કરી લીધી છે.
