વિદેશ જવાની લાલચ આપી 72 લાખની છેતરપિંડી કરનાર મહિલાની ધરપકડ

પોરબંદરમાં 3 ગુનાના વોન્ટેડ આરોપીઓ ઝડપાયા : ડિમોલિશન સમયે પોલીસ પર હુમલાના બનાવમાં 4  વર્ષથી ફરાર શખ્સ ઝડપાયો : રોકાણની લાલચે ઠગાઇ કરનાર આરોપીની ધરપકડ

પોરબંદર, : પોરબંદરમાં ઠગાઇના બે ગુના સહિત 3 ગુનાના ફરાર આરોપીઓને પોલીસ ઝડપી લીધા હતા. પોરબંદરના યુવાનોને વિદેશ જવાની લાલચ આપી 72.50 લાખની છેતરપિંડીના ગુનામાં મહિલાની ધરપકડ થઇ છે. રાજસ્થાનના જયપુર ખાતે રહેતી મહિલાને મુંબઇના અંધેરી વેસ્ટ ખાતેથી પોલીસે દબોચી લીધી હતી. 

પોરબંદરમાં યુવાનોને વિદેશ લઇ જવાની લાલચ આપી ખોટા વિઝાના નામે 72.50 લાખની છેતરપિંડીના ગુનાની આરોપી શુભ્રા આચાર્ય (રહે. જયપુર, રાજસ્થાન)ને પોરબંદર પોલીસે ટેકનિકલ તથા હ્યુમન સોર્સની મદદથી બાતમીના આધારે મુંબઇના અંધેરી વેસ્ટથી ઝડપી લીધી હતી. તથા રિમાન્ડ માટે કોર્ટમાં રજૂ કરવા કાર્યવાહી હાથ ધરી છે.  પોરબંદરમાં દરગાહના ડિમોલિશન સમયે પોલીસ ઉપર હુમલો કરવાના ગુનામાં 4 વર્ષથી ફરાર આરોપી હાજી સલીમ કરીમભાઇ મુકાદમ (ઉ.વ. 60)ને પોલીસે ઝડપી અગાઉની કાર્યવાહી હાથ ધરી છે.  પોરબંદરમાં પ્લોટ માટે રોકાણની લાલચ આવી 60 લાખથી વધુ છેતરપિંડી કરાતા 4 આરોપીઓ સામે ફરિયાદ નોંધાઇ હતી. ઠગાઇના ગુનામાં એક વર્ષથી ફરાર આરોપી તરૂણ યોગેન્દ્રભાઇ છાબરા (ઉ.વ. 44)ને પોરબંદર પોલીસે હરિયાણાના ગુડગાંવ ખાતેથી બાતમીના આધારે ઝડપી લીધો હતો.