સુરતમાં પીપલોદના લેક વ્યુ ગાર્ડનમાં મેઈન્ટેનન્સ અભાવે મુલાકાતીઓ ઈજાગ્રસ્ત થયા, સ્થાયી સુચના બાદ રીપેરિંગ શરૂ કરાયું

Surat Corporation : સુરત પાલિકાના અઠવા ઝોનમાં લેક વ્યુ ગાર્ડનમાં મેઈન્ટેનન્સ ન થતું હોવાથી વોક વે અને રમત ગમતના સાધનો તુટ્યા હતા. પાલિકા અને ભાગીદાર કંપનીની બેદરકારીના કારણે ગાર્ડનમાં મુલાકાતે આવતા કેટલાક લોકોને ઈજા થઈ હતી. આ ફરિયાદ બાદ સ્થાનિક કોર્પોરેટરે ઝોન અને એજન્સી બન્નને ફરિયાદ કરી છતાં કોઈ રીપેરીંગ કામગીરી થઈ ન હતી. ગત સ્થાયી સમિતિની બેઠકમાં ફરિયાદ થયા બાદ ગંભીર નોંધ લઈ એક અઠવાડિયામાં કામગીરીનો રિપોર્ટ સાથે હાજર રહેવા તાકીદ કરતા તાત્કાલિક રીપેરીંગ કામ શરૂ કરી દેવાયું હતું. 

સુરતના ગાર્ડનને ઝીરો મેઈન્ટેનન્સ માટે પીપીપી મોડલ અપનાવ્યું છે પરંતુ કેટલીક જગ્યાએ પાલિકા સાથે ભાગીદારી કરનારી એજન્સીની નબળી કામગીરીનો ભોગ ગાર્ડનના મુલાકાતીઓ બની રહ્યા છે. સુરતના પીપલોદ વિસ્તારમાં લેક વ્યુ ગાર્ડનને પીપીપી મોડલ પર ટોરેન્ટ કંપનીને આપવામાં આવ્યો છે. જોકે, છેલ્લા ઘણા વખતથી ગાર્ડનમાં મેઈન્ટેનન્સ થતું ન હોવાથી વોક વે ઉખડી ગયો છે અને રમત ગમતના સાધનો પણ તુટી ગયા હતા. જેથી વોક વેનો ઉપયોગ કરનારા કેટલાક મુલાકાતીઓ પડી ગયા હતા અને ઈજા પણ થઈ હતી. 

આ અંગે સ્થાનિક કોર્પોરેટર અને સ્થાયી સમિતિના સભ્ય ડિમ્પલ કાપડીયાએ અઠવા ઝોન અને ટોરેન્ટ કંપનીને ફરિયાદ કરી હતી. જોકે, આ ફરિયાદ બાદ પણ રીપેરીંગ કામગીરી ન થતા સ્થાયી સમિતિની બેઠકમાં ફરિયાદ કરવામાં આવી હતી. સ્થાયી અધ્યક્ષે ફરિયાદ ગંભીરતાથી લઈ ઝોન અને ટોરેન્ટ કંપનીના પ્રતિનિધિ એક અઠવાડિયા પછીની સ્થાયી સમિતિમાં કામગીરીનો અહેવાલ સાથે હાજર રહેવા તાકીદ કરી હતી. જેના કારણે કંપની દ્વારા તાત્કાલિક રીપેરીંગ કરીને ફોટોગ્રાફ સાથે વિગતો સ્થાયી સમિતિને આપી હતી. આ ઉપરાંત થોડા જ દિવસમાં મેન્ટેનન્સની કામગીરી પૂરી થશે તેવી બાંહેધરી પણ આપી છે.