ચકલાસીમાં બર્થડે પાર્ટીમાં જાહેરમાં બિયર પીતા હોવાનો વીડિયો વાયરલ

ડીજેના તાલે નશામાં ઝૂમતા મહેફિલના દ્રશ્યોથી ખળભળાટ

રાજ્યમાં દારૂ અને ડ્રગ્સની બદીના વિરોધ વચ્ચે ખેડા જિલ્લામાં દારૂબંધીના ધજાગરા

નડિયાદ: નડિયાદના ચકલાસી વિસ્તારમાં ગુરૂવારે ગનીભાઈ નામના વ્યક્તિની જન્મ દિવસની ઉજવણીમાં જાહેરમાં બિયરના ટીન પીતા હોવાનો વીડિયો સોશિયલ મીડિયા પર વાયરલ થયો છે. રાજ્યમાં દારૂ અને ડ્રગ્સની બદીઓ વિરુદ્ધ આક્રમક રીતે વિરોધ કરવામાં આવી રહ્યો છે, ત્યારે આવા દ્રશ્યો સામે આવતા તંત્રની કામગીરી સામે પણ અનેક સવાલો ઊભા થયા છે.

ગુજરાતમાં દારૂબંધી હોવા છતાં જાહેરમાં દારૂ પીવાતો હોવાનો વધુ એક વીડિયો સામે આવ્યો છે. નડિયાદના ચકલાસીનો એક વીડિયો હાલમાં સોશિયલ મીડિયા પર ખૂબ વાયરલ થઈ રહ્યો છે. ચકલાસી વિસ્તારમાં ગનીભાઈ નામના વ્યક્તિની બર્થડે પાર્ટીનું આયોજન કરવામાં આવ્યું હતું. 

આ ઉજવણી દરમિયાન બિયરના કેન પીવાયા હોવાનું અને ડીજેના તાલે નશામાં ઝૂમતા મહેફિલના દ્રશ્યો વીડિયોમાં દેખાઈ રહ્યાં છે. રાજ્યમાં દારૂ અને ડ્રગ્સ મામલે રાજ્ય સરકારને ભીંસમાં લેવામાં આવી રહી છે ત્યારે આ દ્રશ્યો જાણે લડતને સાચી ઠેરવતું હોય તેવા દ્રશ્યો સામે આવતા તંત્ર સામે પણ અનેક સવાલો ઉભા થયા છે.

 જે સોશિયલ મીડિયા પ્લેટફોર્મ ઈન્સ્ટાગ્રામ પર આ વીડિયો અપલોડ કરાયો છે, તે પેજમાં અન્ય તમામ વીડિયોમાં પણ ડીજેની સ્પર્ધાઓ અને બેફામ અવાજથી ડીજે વગાડી ઉશ્કેરણીજનક લાઈનો બોલવામાં આવતી હોવાનું જોવા મળી રહ્યું છે, જે કાયદો અને વ્યવસ્થાની સ્થિતિ પર સવાલો પેદા કરે છે.