સુરતમાં કોર્પોરેટર બનાવા ઈચ્છુક દાવેદારોએ જ કર્યો નિયમોનો ઉલાળીયો : ભાજપ કાર્યાલય બહાર જ આડેધડ વાહનોનો ખડકલો

Surat : સુરત પાલિકાની ચૂંટણી લડવા ઇચ્છુક ભાજપના કાર્યકરોને સાંભળવા માટે ભાજપ કાર્યાલય ખાતે આજથી ત્રણ દિવસની પ્રક્રિયા શરૂ કરવામાં આવી છે. ભાવિ કોર્પોરેટર બનવા થનગનતા આ દાવેદારોએ પાલિકા-પોલીસના નિયમોનો છડેચોક ભંગ કર્યો હતો. ભાજપ કાર્યાલય પર પોતાની દાવેદારી માટે આવેલા કાર્યકરોએ પોતાની કાર સહિતના વાહન જાહેર રસ્તા પર કે સાયકલ ટ્રેકમાં પાર્ક કરી દીધા હતા. સામાન્ય લોકો હોસ્પિટલ કે અન્ય જગ્યાએ થોડીવાર પણ રોડ પર વાહન પર વાહન પાર્ક કરે તો પોલીસ લોક કરી દે છે. ભાજપના કાર્યકરોના વાહન કલાકો સુધી પડી રહ્યા છતાં કોઈ કાર્યવાહી નહીં થતા પોલીસની કામગીરી ક ઓફ ધ ટાઉન બની રહી છે. 

સુરત પાલિકાના કોર્પોરેટર બનવા માટેના દાવેદારોનાં મનની વાત જાણવા માટે પ્રદેશ ભાજપમાંથી નિરીક્ષકો આવ્યા છે. આજથી ત્રણ દિવસ માટે કોર્પોરેટર બનવા ઇચ્છતા ભાજપના કાર્યકરો મોટી સંખ્યામાં ભાજપ કાર્યાલય ખાતે પહોંચી ગયા છે. જકે, કોર્પોરેટર બનવા ઇચ્છતા ભાજપના કાર્યકરોએ પાલિકા અને પોલીસના નિયમોના ધજીયા ઉડાવી દીધા છે. ભાજપ કાર્યાલય બહારનો મુખ્ય રસ્તો અને સાયકલ ટ્રેક પર કોર્પોરેટર બનવા ઇચ્છતા દાવેદારોએ પોતાના વાહનો આડેધડ પાર્ક કરી દીધા હતા. 

સુરત શહેર વિસ્તારમાં કોઈ સામાન્ય વ્યક્તિ હોસ્પિટલમાં કે અન્ય જગ્યાએ જાય અને માત્ર પાંચ દસ મિનિટ પોતાના વાહનો રોડના કોર્નર પર પાર્ક કરે તો સુરતની ટ્રાફિક પોલીસ ઝડપથી આવીને વાહનો લોક કરી દે છે અને ટુ-વ્હીલર હોય તો ઊંચકી જાય છે. નિયમનો ભંગ કરનારા પાસે પોલીસ આકરો દંડ પણ વસૂલ કરે છે.

 પરંતુ ભાજપ કાર્યાલય બહાર રવિવારે આખો દિવસ જાહેર રોડ પર અને સાઇકલ ટ્રેક પર વાહન પાર્ક હોવા છતાં પોલીસે નજર સુદ્ધા દોડાવી ન હતી. જેના કારણે સુરત પોલીસ ટ્રાફિક નિયમના પાલન માટે નેતાઓ માટે અલગ અને પ્રજા માટે અલગ માપદંડ રાખી રહી છે તેવો આક્રોશ લોકોમાં જોવા મળી રહ્યો છે.