વાપીમાંથી રૂ. 30 કરોડનું MD ડ્રગ્સનું ગોડાઉન ઝડપાયું, દમણની ફેક્ટરીમાં કરાતું હતું ઉત્પાદ, 1ની ધરપકડ 3 ફરાર

Vapi News: ગુજરાતના યુવાનોમાં ડ્રગ્સનો ફેલાવો અટકાવવા માટે ગુજરાત એન્ટી-ટેરરિઝમ સ્ક્વોડ (ATS) દ્વારા એક મોટી કાર્યવાહી કરવામાં આવી છે. ATS એ દમણ પોલીસ અને વલસાડ SOGના સહયોગથી ગુરુવારે દમણમાં એક ગુપ્ત ફેક્ટરીનો પર્દાફાશ કર્યો છે, જ્યાં સિન્થેટિક ડ્રગ મેફેડ્રોન (MD)નું મોટા પાયે ઉત્પાદન થતું હતું, જે વાપીના ચાલા વિસ્તારમાં આવેલા એક બંગલામાં સ્ટોર કરવામાં આવતું હતું.

ATS ટીમે આ ઓપરેશનમાં રૂ. 30 કરોડની આંતરરાષ્ટ્રીય બજાર કિંમત ધરાવતો 5.9 કિલોગ્રામથી વધુ નશીલો પદાર્થ જપ્ત કર્યો છે. ડ્રગ્સ ઉપરાંત, ઉત્પાદનમાં વપરાયેલો 300 કિલોગ્રામ કાચો માલ અને અત્યાધુનિક સાધનો પણ જપ્ત કરવામાં આવ્યા છે.

વાપીમાં સ્ટોરેજ અને દમણમાં ઉત્પાદન

પોલીસ અધિકારીઓના જણાવ્યા અનુસાર, ડ્રગ્સની આ ફેક્ટરી દમણના બામનપુજા સર્કલ પાસે આવેલા એક ફાર્મહાઉસમાં ચલાવવામાં આવતી હતી, જ્યારે તૈયાર થયેલું MD ડ્રગ્સ મુંબઈ સપ્લાય કરવા માટે વાપીના ચાલા વિસ્તારમાં આવેલા એક બંગલામાં સ્ટોર કરવામાં આવતું હતું. નિશ્ચિત બાતમીના આધારે ATS ટીમે 2 ઓક્ટોબરના રોજ આ બંને સ્થળો પર દરોડા પાડ્યા હતા.

ઓપરેશનનું નેતૃત્વ કરનાર નાયબ પોલીસ અધિક્ષક એસ.એલ. ચૌધરીએ જણાવ્યું કે, "દરોડામાં મેફેડ્રોન બનાવવાની પ્રક્રિયા ચાલુ હોવાનું જણાયું હતું. અમે તૈયાર માલ, કાચા રસાયણો, ગ્રાઇન્ડર, મોટર, ફ્લાસ્ક અને હીટર સહિતના ઉત્પાદન સાધનો જપ્ત કર્યા છે. સ્થળ પરથી એક આરોપીને ઝડપી લેવામાં આવ્યો છે, જ્યારે અન્ય બે આરોપીઓ ફરાર થવામાં સફળ રહ્યા છે."

અગાઉ પેરોલ જમ્પ કરનાર આરોપી પકડાયો

ઝડપાયેલા આરોપીની ઓળખ વાપીના તપોવન-2ના રહેવાસી મોહન નારાયણલાલ પાલીવાલ તરીકે થઈ છે. મોહનનો ગુનાહિત ઇતિહાસ રહ્યો છે અને તે અગાઉ NDPS એક્ટ હેઠળ બે કેસમાં ઝડપાયો હતો. અધિકારીઓએ ઉમેર્યું કે પાલીવાલ પેરોલ જમ્પ કરીને ફરાર હતો અને આ રેકેટમાં ફરી સક્રિય થયો હતો.

ફરાર મેહુલ હત્યા કેસનો આરોપી

જે બે મુખ્ય આરોપી ફરાર થયા છે તેમાં એક આરોપી વાપીના આદર્શ બંગલોઝનો રહેવાસી મેહુલ રાજનેસિંગ ઠાકુર છે, જે હત્યા કેસનો આરોપી છે અને હાલ તે જામીન પર છે. અને બીજો આરોપી છે વાપીના ગાયત્રીનગરનો કેમિસ્ટ વિવેક બલેન્દ્ર રાય. બંને આરોપીઓ વિરુદ્ધ FIR નોંધવામાં આવી છે અને તેમને ઝડપી પાડવા માટે ટીમો રવાના કરવામાં આવી છે. 

બંગલાના માલિકની સંડોવણીની અટકળો

મળતી માહિતી મુજબ વાપીમાં જે બંગલામાંથી ડ્રગ ઝડપાયું તે ઘરનો માલિક મનોજ ઠાકુર છે. જે ફરાર આરોપી મેહુલ ઠાકરોનો સગો ભાઈ હોવાની અને ભાજપનો સક્રિય કાર્યકર હોવાની ચર્ચા છે. જેથી મનોજ ઠાકુરની પણ આ કૌભાંડમાં સંડોવણી હોવાની શક્યતાની અટકળો તેજ થઈ છે. ડ્રગ્સના વેપલામાં સંડોવાયેલો વોન્ટેડ આરોપી મેહુલ ઠાકુર પોતાની છબી પ્રતિષ્ઠિત હોવાનું બતાવવા છેલ્લા થોડા સમયથી સ્ટીલમેન ફાઉન્ડેશનના નામથી સામાજિક કાર્યોમાં સક્રિય થયો હતો

મુંબઈ સપ્લાય ચેઇન અને ગોવા કનેક્શનની તપાસ

પાલીવાલની પ્રાથમિક પૂછપરછમાં ખુલાસો થયો છે કે આ ત્રણેય છેલ્લા ત્રણથી ચાર મહિનાથી કાચો માલ અને સાધનો એકઠા કરી રહ્યા હતા. તેઓ દમણના ફાર્મહાઉસમાં રાસાયણિક પ્રક્રિયા કરીને ડ્રગ્સ બનાવતા હતા અને તૈયાર MD ડ્રગ્સ ઠાકુરના વાપી સ્થિત બંગલામાં જમા કરતા હતા. આ કન્સાઇનમેન્ટ મુંબઈ સપ્લાય કરવાનું હતું.

એક વરિષ્ઠ ATS અધિકારીએ જણાવ્યું હતું કે, 'અમે આ કાર્ટેલના ખરીદદારો, નાણાં પૂરા પાડનારાઓ અને અન્ય સભ્યો સહિતની મોટી સપ્લાય ચેઇનની તપાસ કરી રહ્યા છીએ. ઓપરેશનની નાણાકીય લેવડ-દેવડ અને આંતર-રાજ્ય કનેક્શનની પણ તપાસ ચાલી રહી છે.NDPS એક્ટની સંબંધિત કલમો હેઠળ કેસ દાખલ કરીને વધુ તપાસ હાથ ધરવામાં આવી છે'.