Vadodara : વડોદરા શહેરમાં પ્રથમવાર કેન્દ્ર સરકારના નેશનલ ક્લીન એર પ્રોગ્રામ અંતર્ગત હવાની ગુણવત્તાની સતત દેખરેખ રાખવા જીપીસીબી દ્વારા કન્ટીન્યુસ એમ્બિયન્ટ એર ક્વોલિટી મોનીટરીંગ સ્ટેશન કારેલીબાગ વિસ્તારમાં સવાદ અર્બન હેલ્થ સેન્ટર ખાતે સ્ટેશન મૂકાયું છે.
વડોદરા શહેરની આસપાસમાં આવેલા ઉદ્યોગો અને ઉત્તરોતર વધી રહેલા વાહનોની સંખ્યાને કારણે હવાનું પ્રદૂષણ ઉત્તરોત્તર વધી રહ્યું છે. ખાસ કરીને ઉત્તર અને પશ્ચિમ વિસ્તારમાં અવારનવાર તીવ્ર દુર્ગંધ ફેલાવવા સાથે લોકોને શ્વાસ લેવામાં તકલીફ અને આંખોમાં બળતરા થવાની ફરિયાદો ઉઠે છે. ત્યારે વડોદરામાં પ્રથમવાર ચોવીસ કલાક કાર્યરત રહે તે પ્રમાણેનું એર ક્વોલિટી મોનીટરીંગ સ્ટેશન મૂકાયું છે. કોર્પોરેશને જગ્યા ફાળવતા કારેલીબાગ સવાદ અર્બન હેલ્થ સેન્ટર ખાતે આ સિસ્ટમ મૂકાયું છે. બહારની તરફ એલસીડી ડિસ્પ્લે પણ મુકાઈ છે. જેથી લોકો રીયલ ટાઇમ ડેટા જાણી શકશે. જો કે, હજુ પણ વીજ સપ્લાય સહિતના કારણોસર કાર્યરત થવામાં વિલંબ થઈ રહ્યો છે. નવું સ્ટેશન બનવાથી જીપીસીબી તથા સીપીસીબીના સર્વર પર ડેટા પહોંચતા વેબસાઈટ તથા સમીર એપ ઉપર જનતા રિયલ ટાઈમ એક્યૂઆઈ (એર ક્વોલીટી ઇન્ડેક્સ) જાણી શકશે. જેમાં હ્યુમન હેન્ડલિંગ રહેશે નહીં. હાલ શહેરમાં અલગ અલગ પાંચ સ્થળોએ સપ્તાહમાં બે વખત મેન્યુઅલી મોનિટરિંગ થઈ રહ્યું છે.
