વેટરન વેસ્ટઝોન ટી-૨૦ ક્રિકેટ ટુર્નામેન્ટની ફાઈનલમાં વડોદરાની ટીમનો ચાર રનથી વિજય

વેટરન ક્રિકેટર્સ એસોસિએશન અને બરોડા ક્રિકેટ એસોસિએશન દ્વારા સ્વ. અંશુમન ગાયકવાડની સ્મૃતિમાં આયોજિત વેટરન વેસ્ટ ઝોન ટી-૨૦ ક્રિકેટ ટુર્નામેન્ટની ફાઈનલ મેચમાં વડોદરાની ટીમે ગુજરાત સામે ૪ રનથી વિજય મેળવી ચેમ્પિયન ટ્રોફી હાંસલ કરી છે.

પ્રથમ બેટિંગ કરતાં વડોદરાએ ૧૦ વિકેટ ગુમાવી ૧૮૩રનનો સ્કોર ઉભો કર્યો હતો. ઈર્શાદ સિંધીએ ૪૨ રનની મહત્વપૂર્ણ ઇનિંગ રમી, જ્યારે શત્રુંજય ગાયકવાડે ૪૦ અને રાજેશ ડામોરે ૩૭રન બનાવી ટીમને મજબૂત સ્થિતિમાં પહોંચાડી હતી. ગુજરાત તરફથી નિરવ પટેલે ૪૦ રન આપી ૪ વિકેટ ઝડપી હતી.

જવાબમાં ગુજરાતની ટીમે ૮ વિકેટ ગુમાવી ૧૭૯ રન બનાવ્યા હતા. અંકિત રાણા અણનમ ૪૬ રન પર રહ્યા હતા, જ્યારે વિવેક જૈને ૪૬ રનની નોંધપાત્ર ઇનિંગ રમી હતી.

વડોદરાના બોલર મુર્તઝા વોહરાએ ૨૯ રન આપી ૩ વિકેટ ઝડપી હતી. અંતે વડોદરાએ ૪ રનથી રોમાંચક વિજય મેળવી ખિતાબ જીત્યો હતો.જ્યારે રનર્સ અપ ગુજરાતને નારાયણ રાવ સાઠમ ટ્રોફીથી સન્માનિત કરાઈ હતી.

આત્રિ દિવસીય સ્પર્ધામાં વેસ્ટ ઝોનની પાંચ ટીમો મુંબઈ, મહારાષ્ટ્ર, ગુજરાત, સૌરાષ્ટ્ર અને વડોદરાની ટીમોએ ભાગ લીધો હતો.