વડોદરા: સિંધરોટના Rs 477 કરોડના ડ્રગ્સ કેસમાં આરોપી યોગેશ તડવીની જામીન અરજી કોર્ટે ફગાવી

Sindhrot Mephedrone Drugs Case: વડોદરા જિલ્લાના સિંધરોટ ગામની સીમમાં કાર્યરત પતરાના શેડવાળી ફેક્ટરીમાંથી રૂ. 477 કરોડનું મેફેડ્રોન ડ્રગ્સ કબજે કરવાના ચકચારી બનાવમાં સંડોવાયેલા આરોપીની જામીન અરજી અદાલતે નામંજૂર કરી હતી. ન્યાયાધીશે ચુકાદામાં નોંધ્યું હતું કે, આરોપી સામે ગંભીર પ્રકારનો ગુનો છે અને ઝડપાયેલો ડ્રગ્સનો જથ્થો કોમર્શિયલ ક્વોન્ટિટીનો છે.

કેસની વિગત એવી છે કે, વર્ષ 2022માં ATSની ટીમે બાતમીના આધારે સિંધરોટમાં પતરાના શેડમાં ચાલતી ફેક્ટરીમાં રેડ પાડી રૂ. 4,77,38,50,000નો પ્રતિબંધિત માદક પદાર્થનો જથ્થો ઝડપી પાડ્યો હતો. ઘટનાસ્થળેથી કુલ 63 કિલો 613 ગ્રામ તૈયાર મેફેડ્રોન ડ્રગ્સ અને 80 કિલો 260 ગ્રામ જેટલું ડ્રગ્સ બનાવવાનું પ્રવાહી કેમિકલ જપ્ત કર્યું હતું અને આ કેસમાં યોગેશ નંદકિશોર તડવી સહિતના આરોપીઓની ધરપકડ કરી હતી.

હાલ જેલમાં રહેલા આરોપી યોગેશ તડવીએ જામીન અરજી મૂકતા તેની સુનાવણીમાં મુખ્ય સરકારી વકીલ અનિલ દેસાઈએ રજૂઆત કરી હતી કે, ચાર્જશીટના આધારે સ્પષ્ટ થાય છે કે આરોપી મુંબઈ મુકામે ડ્રગ્સનો માલ મોકલવાનું કામકાજ સંભાળતો હતો. જો આરોપીને મુક્ત કરવામાં આવશે તો સમાજ પર વિપરીત અસર પડશે. વળી, સમાન રોલ ધરાવતા અન્ય સહ-આરોપી અનિલની જામીન અરજી પણ અદાલતે નામંજૂર કરી છે. ન્યાયાધીશે બંને પક્ષની દલીલો સાંભળ્યા બાદ અરજદાર યોગેશ તડવીની જામીન અરજી નામંજૂર કરી હતી.