રાજ્યમાં GUJCTOCના ગુનાઓમાં વડોદરા અગ્રેસરઃ હવે ચોરી-લૂંટ કરતી સુનિલ પાન ગેંગના 9 સાગરીતો પર સકંજો
વડોદરાઃ વડોદરા પોલીસે ગુજસીટોક હેઠળ લૂંટ,ચોરી અને વાહનચોરી જેવા સંખ્યાબંધ ગુનાઓ આચરતી વધુ એક ગેંગ પર સકંજો કસ્યો છે અને સૂત્રધાર સુનિલ પાન અને તેના દાદા સહિત ૯ સામે સમા પોલીસ સ્ટેશનમાં ગુનો નોંધવામાં આવ્યો છે.
નવરાત્રીમાં ગાજરાવાડી વિસ્તારમાં એક પરિવારને તલવાર બતાવી બાનમાં લીધા બાદ રોકડ અને દાગીનાની લૂંટ ચલાવનાર ગેંગના ત્રણ સાગરીતો પ્રેમસિંગ,કુલદીપ તેમજ અમરસિંગ પકડાઇ ગયા બાદ પોલીસ કમિશનર નરસિમ્હા કોમરે આ ગેંગના નેટવર્કની તપાસ કરવા માટે ક્રાઇમ બ્રાન્ચને સૂચના આપી હતી.
પોલીસે ટોળકીના નેટવર્કની તપાસ કરતાં વડોદરા તેમજ રાજ્યના જુદાજુદા જિલ્લાઓમાં ૧૦ વર્ષ દરમિયાન ઘરફોડ ચોરીઓ,લૂંટ, વાહનચોરી,પોલીસ પર હુમલા જેવા ૯૬ જેટલા ગુનાઓમાં સૂત્રધાર સુનિલસિંગ પાનસિંગ ઉર્ફે અર્જુનસિંગ બાવરી તેમજ તેના ૯ જેટલા સાગરીતો સામેલ હોવાનું જણાઇ આવ્યું હતું.જેથી તમામ સામે સંગઠિત અપરાધ બદલ ગુનો નોંધવામાં આવ્યો છે.
ક્રાઇમ બ્રાન્ચના લેડી પીઆઇ હેતલ તુવેરે આ ગેંગ સામે સમા પોલીસ સ્ટેશનમાં ફરિયાદ નોંધાવતા પોલીસે સૂત્રધાર સુનલસિંગ પાનસિંગ બાવરી(નવીનગરી,દુમાડ ગામ,વડોદરા),તેના દાદા ભીલસિંગ રતનસિંગ ઉર્ફે સંતોકસિંગ ટાંક (જય ભાથીજી નગર,ન્યુ વીઆઇપી રોડ) અને કિરપાલસિંગ ઉર્ફે પાલેસિંગ તારાસિંગ તિલપીતિયા(ઇન્દિરા નગરી,કોયલી)ને ઝડપી પાડયા છે.
GUJCTOC હેઠળ વડોદરામાં છઠ્ઠો ગુનો નોંધાયો
ગુજરાત આતંકવાદ અને સંગઠિત ગુના નિયંત્રણ અધિનિયમ-૨૦૧૫(ગુજસીટોક) હેઠળ ગુના નોંધવામાં વડોદરા શહેર પોલીસ અગ્રેસર રહી છે.ખંડણીખોર અસલમ બોડીયાની બિચ્છુ ગેંગ,ઘરફોડ ચોરીઓ કરતી રાજવીર અને જોગિન્દરસિંગની સિકલીગર ગેંગ, દારૃ સહિતના ગુનાઓમાં સામેલ કાસમઆલા ગેંગ,દારૃનું નેટવર્ક ચલાવતી અલ્પુ સિન્ધી અને જુબેર મેમણની ટોળકી તેમજ પાણીગેટની સૂરજ ચૂઇ ગેંગ સામે ગુજસીટોક હેઠળ ગુના નોંધવામાં આવ્યા હતા. ત્યારબાદ હવે રાજ્યમાં ચોરી,લૂંટ જેવા ૯૬ ગુનાઓ આચરવામાં સામેલ સુનિલ પાન ગેંગના ૯ સાગરીતો સામે ગુનો નોંધવામાં આવ્યો છે.
ગેંગના 3 પકડાયા,4 જેલમાં અને 2 વોન્ટેડ છે
સુનિલ પાન ગેંગના ૯ સાગરીતો સામે પોલીસે ગુનો નોંધ્યા બાદ સૂત્રધાર સુનિલસિંગ પાનસિંગ બાવરી સહિત કુલ ત્રણ જણા પકડાયા છે.જ્યારે,ગાજરાવાડીમાં તલવારની અણીએ લૂંટ ચલાવનાર ત્રણ જણા જેલમાં છે.આ ઉપરાંત રવિસિંગ સરદાર હાલ ગોધરાની જેલમાં છે.જ્યારે,રાજાસિંગ ટાંક(હાલ ડેસર મૂળ સ્વાદ ક્વાટર્સ,હરણી) અને ગુરમુખસિંગ(સયાજીપુરા)હાલમાં વોન્ટેડ છે.
ક્યા આરોપી સામે કેટલા ગુના
આરોપીનું નામ ગુનાની સંખ્યા
સુનિલસિંગ બાવરી ૩૦
ભીલસિંગ ટાંક ૨૫
રાજાસિંગ ટાંક ૨૩
રવિસિંગ સરદાર ૧૫
પ્રેમસિંગ બાવરી ૧૩
અમરસિંગ બાવરી ૯
કિરપાલસિંગ ૮
કુલદીપસિંગ બાવરી ૬
ગુરમુખસિંગ જની ૩
