વડોદરા, તા. 01 ડિસેમ્બર 2021 બુધવાર
શહેરની મધ્યમાં આવેલા સુરસાગર તળાવમાં વચ્ચેના પાણીના ભાગમાં બોટિંગ શરૂ કરવા માટે વડોદરા મ્યુનિસિપલ કોર્પોરેશને આયોજન હાથ ધર્યું છે. સમગ્ર સભાની મંજૂરી માટે આ અંગે સ્ટેન્ડિંગ કમિટીમાં દરખાસ્ત રજૂ કરાઈ છે. બોટિંગ શરૂ કરવા મેયર એ સૂચન કરતાં અમદાવાદ કોર્પોરેશન દ્વારા કાંકરિયા તળાવમાં બોટિંગ સુવિધાના જે નીતિ નિયમો નક્કી કરાયા છે તેનું માર્ગદર્શન મેળવ્યું હતું. જેના આધારે સુરસાગર બોટિંગ માટેના કેટલાક નિયમો તૈયાર કર્યા છે.
બોટિંગ માટે જે કોઈ સંચાલક આવે તેણે પોલીસ અને ફાયર સેફટી વિભાગના અભિપ્રાય મુજબ કોર્પોરેશનના નામ નો વીમો લેવાનો રહેશે. બોટિંગ ને લગતી તમામ કામગીરી જેમકે ઈન્ફ્રાસ્ટ્રક્ચર ,સીસીટીવી, પ્લેટફોર્મ ટિકિટ કાઉન્ટર વગેરે તમામ ખર્ચ તેમજ મેન્ટેનન્સના ખર્ચ સંચાલકે ભોગવવાનો રહેશે .આ લીઝ પીરીયડ ની સમય મર્યાદા ત્રણ વર્ષ રાખી છે.
સંચાલકે છેલ્લા પાંચ વર્ષમાં સતત બે વર્ષની કામગીરી કરેલી હોવી જોઈશે. ટિકિટની આવક માંથી કોર્પોરેશનને આપવા પાત્ર રકમ ના જે ટકા નક્કી થાય તે મુજબ ભાવ પત્રક નિયત કરાશે. બોટિંગ ટિકિટનું સોફ્ટવેર પાલિકાના આઇટી વિભાગ પાસે એપ્રુવ કરાવવું પડશે. હરણી મોટનાથ તળાવમાં બોટિંગ ટિકિટ નો ભાવ 30 મિનીટ નો 50 છે, તે મુજબ રૂપિયા 50 નો ભાવ 30 મિનિટનો રાખી શકાશે, અથવા સ્થાયી સમિતિ નક્કી કરે તે મુજબ ભાવ રાખવામાં આવશે. સંચાલક પેડલ અથવા મશીન બોટ રાખી શકશે. કોઈપણ અકસ્માત થાય તો તેની જવાબદારી સંચાલકની રહેશે. સ્ટેન્ડિંગ સમિતિમાં દરખાસ્ત મંજૂર થયા બાદ ટેન્ડર વગેરેની પ્રક્રિયા હાથ ધરાશે.
