વડોદરા મ્યુ. કોર્પોરેશનની યુ.સી.ડી. ઓફિસમાં પી.એમ. સ્વનિધિ લોન માટે અરજદારોનો હોબાળો

Vadodara Corporation : વડોદરાના સલાટવાડા વિસ્તારમાં આવેલી મ્યુનિસિપલ કોર્પોરેશનની યુ.સી.ડી. શાખાની ઓફિસ ખાતે આજે પી.એમ. સ્વનિધિ લોન માટે અવારનવાર પડતા ધક્કાથી ત્રાહિમામ પોકારી ઊઠેલા અરજદારોએ ભારે હોબાળો મચાવ્યો હતો.

છેલ્લા છ દિવસથી લોન માટે દોડધામ કરનારા અરજદારોનું કહેવું છે કે ઓફિસના અધિકારીઓ અને કર્મચારીઓ અલગ–અલગ કારણો આપી રહ્યા છે. ક્યારેક સર્વરની સમસ્યા, ક્યારે ત્રણ કલાક પછી આવો, તો ક્યારે ઓફિસ શિફ્ટિંગ ચાલી રહ્યું છે, તેવા વિરોધાભાસી જવાબોથી તેઓ મૂંઝવણમાં મુકાયા હતા. અરજદારોનું કહેવું છે કે, ટોકન મેળવવા તેઓ રોજ કામકાજ છોડીને વહેલી સવારથી લાઈનમાં ઊભા રહે છે, છતાં પણ યોગ્ય માર્ગદર્શન મળતું નથી. બીજી તરફ મ્યુનિસિપલ અધિકારીએ જણાવ્યું છે કે ઓફિસ શિફ્ટિંગની કામગીરી ચાલી રહી હોવાથી હાલ થોડી અવ્યવસ્થા સર્જાઈ છે. અમે આજે અરજદારોને ટોકન ફાળવી આપીશું. ઓફિસ રેલ્વે સ્ટેશન નજીક જનમહલ ખાતે શિફ્ટ કરવામાં આવી રહી છે, તેમ અધિકારીએ સ્પષ્ટ કર્યું હતું. અત્રે ઉલ્લેખનીય છે કે, સ્ટ્રીટ વેન્ડર્સ, લારી–ગલ્લા ધારકો માટે કેન્દ્ર સરકારે પી.એમ. સ્વનિધિ લોન યોજના શરૂ કરી છે, જેનો હેતુ નાના વેંડર્સને આર્થિક મદદ પહોંચાડવાનો છે.