સિટી બસ સર્વિસનું સંચાલન વડોદરા કોર્પોરેશન પોતે કરશે

વડોદરાવડોદરામાં સ્માર્ટ સિટી પ્રોજેક્ટ હેઠળ સ્માર્ટ સિટી બસ સર્વિસનો ઈજારો વર્ષ ૨૦૧૭ થી ખાનગી ઓપરેટરને આપ્યો હતો, પરંતુ સ્માર્ટ સિટી બસ સર્વિસ માટે ફાળવવામાં આવેલા ફંડની મર્યાદા પૂર્ણ થવાના આરે છે અને સ્માર્ટ સિટી મિશન પ્રોજેક્ટ વાઈન્ડ અપ કરવામાં આવનાર હોવાથી વડોદરામાં સિટી બસ સર્વિસનું સંચાલન વડોદરા કોર્પોરેશન પોતાને હસ્તક લઈ લેશે.

વડોદરા સ્માર્ટ સિટી ડેવલપમેન્ટ લિ. તરફથી હવે બસ સંચાલન માટે હવે વધુ ફંડ મળી શકે તેમ નથી. ખાનગી ઓપરેટર વિનાયક લોજિસ્ટિકે પ્રતિ કિમી રૃા.૧૮ના ભાવે સિટી બસો તા.૧-૧૦-૨૦૧૭થી ચાલુ કરી હતી. ઈજારાની પાંચ વર્ષની મુદત પૂરી થતા ફરી તેમાં વખતોવખત વધારો કરાયો હતો. છેલ્લે તા.૧-૪-૨૫ થી ૧૨ માસ માટે ઈજારો લંબાવ્યો હતો. ઈજારાની શરત મુજબ ૩ વર્ષ બાદ પાંચ ટકાના વધારા સાથે આજ સુધીમાં પ્રતિ કિમી ભાવ ૧૯.૮૦ અપાય છે અને બળતરણનો તફાવત અલગથી ચૂકવાય છે. ત્રિમાસિક સરેરાશ મુજબ માસિક આશરે દોઢ કરોડ અપાય છે. સિટી બસના ઈજારા મુજબ જૂન સુધીમાં ૧૨૭ કરોડ ચૂકવાયા છે. મુખ્યમંત્રી શહેરી બસ સેવા હેઠળ પ્રતિ કિમીના મંજૂર ભાવના ૬૦ ટકા લેખે અત્યાર સુધી કોર્પો.ને ૨૩.૧૪ કરોડ મળ્યા છે.

વડોદરા કોર્પોરેશન ૧૦૦ ઈ-બસ સિટીમાં દોડાવશે

વડોદરા કોર્પો.ને સિટી બસ સર્વિસ માટે ૧૦૦ ઈ-બસ ચલાવવાની થશે. આ કાર્યવાહી નેશનલ ઈલેકટ્રિક બસ પ્રોગ્રામ અંતર્ગત પીએમ ઈ-બસ સેવા હેઠળ થશે. ગુજરાત અર્બન ડેવલપમેન્ટ મિશન તરફથી કોર્પો.ની જરૃરિયાત મુજબ ૧૫૦ ઈ-બસ મંજૂર કરવા દરખાસ્ત રજૂ થઈ છે.

૧૦૦માંથી ૪૦ ઈ-બસ ડિસેમ્બરથી ચાલુ કરાશે

૧૦૦ માંથી ૪૦ ઈ-બસ ડિસેમ્બરથી ચાલુ કરવાનું આયોજન છે. શહેરના લોકોને બસ સુવિધા મળી રહે તે કોર્પો.ની નૈતિક ફરજમાં આવતું હોવાથી બસ સેવા ચાલુ રાખવામાં આવનાર છે. સ્માર્ટ સિટી કંપની પાસે ફંડની જોગવાઈ ન હોવાથી કોર્પોરેશન પોતે સંચાલન કરશે, અન્ય વિકલ્પ કાર્યાન્વિત ન થાય ત્યાં સુધી હાલનો ઈજારો ચાલુ રખાશે.