વડોદરા, તા. 30 નવેમ્બર 2021 મંગળવાર
વડોદરા મ્યુનિસિપલ કોર્પોરેશન નો હદ વિસ્તાર અને વસ્તી વધી છે તેની સાથે સાથે કોર્પોરેશનની મશીનરીની પણ આવશ્યકતા વધી ગઈ છે, પરંતુ કોર્પોરેશન પાસે પૂરતા પ્રમાણમાં મશીનરી નથી .જેના કારણે કામગીરી પર અસર થાય છે.
વડોદરા કોર્પોરેશનની હદ 220 .33 ચોરસ કિલોમીટર વિસ્તારમાં ફેલાયેલી છે .વડોદરા કોર્પોરેશન માં વિહિકલ પુલ વિભાગની રચના કરવામાં આવી છે. જેમાં ગાડીઓ ,ટ્રેક્ટરો ,જેસીબી ,ડોઝર વગેરે રાખવામાં આવે છે અને ત્યાંથી જે તે વિસ્તારમાં પહોંચાડવામાં આવે છે. વડોદરા શહેરમાં 19 ચૂંટણી વોર્ડ છે. દરેક વોર્ડમાં એક લાખની વસતિ છે ,પરંતુ જેસીબી 17 છે. જેમાંથી બે પાણી પુરવઠા શાખામાં ,ત્રણ દબાણ શાખામાં, બે લેન્ડફીલ સાઇટ ઉપર એક આટલાદરા પ્લાન્ટ પર હોય છે.
ત્રણ-ચાર બગડેલા હોય છે .એવું જ ડોઝર નું છે. એક લેન્ડફીલ સાઇટ પર, એક અટલાદરા પ્લાન્ટ પર અને એક વોર્ડ ની કામગીરીમાં હોય છે, અને એક કાયમ માટે બગડેલું હોય છે એટલે ઓછી મશીનરીમાં કઈ રીતે કામગીરી થઇ શકે તે સવાલ છે. કોર્પોરેટરો ને પોતાના વિસ્તારમાં પાણી ,ગટર ,વરસાદી ગટર વગેરે સહિતની ખોદકામની કામગીરી માટે જ્યારે આ મશીનો ની જરૂર પડે છે ત્યારે મળતા જ નથી.
શહેરમાં માટીના ઢગલા, કચરાના ઢગલા અને ગંદકી હોય છે જે ઉપાડવા માટે પૂરતા પ્રમાણમાં મશીનરી નથી. જેસીબી ની વાત કરીએ તો સવારે વિહિકલ પુલ શાખા પરથી આઠ વાગે નીકળે, ત્યારે માંડ 11વાગે સ્થળ પર પહોંચે છે. એક કલાક કામગીરી કર્યા બાદ રીશેષમાં જતા રહે છે ,અને બપોરે ત્રણ વાગ્યે ફરી પાછા આવે અને પાંચ વાગ્યે કામગીરી બંધ કરી નાખે છે. આમાં સમય અને નાણાનો બગાડ થાય છે. વિરોધ પક્ષ કોંગ્રેસના પૂર્વ નેતાએ દરેક ચૂંટણી વોર્ડ મુજબ એક જેસીબી અને 10 ડોઝર મશીન રાખવા જોઈએ તેવી માંગ કમિશનરને લેખિત પત્ર દ્વારા કરી છે.
