વડોદરાના બિલ્ડર સાથે બીટકોઈનમાં રોકાણ કરાવવાની લાલચ આપી 90 લાખ રૂપિયાની ઠગાઈ

Vadodara : બીટકોઈનમાં રોકાણ કરવાના બહાને વડોદરાના બિલ્ડર પાસેથી બેંગ્લોરના એક ભેજાબાદ સહિત બે શખ્સોએ 90 લાખ પડાવી લીધા હતા. 

વડોદરાના કારેલીબાગ વિસ્તારમાં આવેલી મંગલજ્યોત સોસાયટીમાં રહેતા નરેન્દ્ર અંબાલાલ પટેલે પાદરા પોલીસ સ્ટેશનમાં રોબર્ટ ઈશ્વર પટેલિયા રહે. પાર્ષિક સોસાયટી ONGC પાસે તેમજ જોસેફ બાબર સેમ્યુઅલ રહે બેંગલોરની સામે નોંધાવેલી ફરિયાદમાં જણાવ્યું છે કે હું કન્સ્ટ્રક્શનનું કામ કરું છું નવેમ્બર 2019માં પાદરા રોડ ઉપર રહેતા મારા મિત્ર પિયુષ અરવિંદ પટેલને મળવા ગયો હતો. તે વખતે મારો અન્ય મિત્ર સિરીશભાઈ પણ સાથે હતો અમે બંને ત્યાં હતા. ત્યારે સિરીશે તેના મિત્ર રોબર્ટ પટેલિયા સાથે ઓળખાણ કરાવી હતી. રોબર્ટે મને જણાવેલ કે હું બીટકોઈનમાં રોકાણ કરું છું સારું રિટર્ન મળે છે તમે પણ તેમાં રોકાણ કરો અને આ બધું કામ જોસફ સેમ્યુઅલ કરે છે તેમ કહી તેણે ફોન ઉપર વાત કરાવી હતી. 

શરૂઆતમાં મને રોકાણ કરવાની ઈચ્છા ના હોવાથી મેં ના પાડી હતી. પરંતુ રોબર્ટે વારંવાર કહેતા તેને મેં હા પાડ્યા બાદ તેના ખાતામાં 62 લાખ ચૂકવ્યા હતા જે આ પૈસા રોબર્ટના એકાઉન્ટમાં રહેતા હોવાથી રોબર્ટે જોસેફના એકાઉન્ટમાં સીધા પૈસા ટ્રાન્સફર કરવાનું કહ્યું હતું જેના પગલે મેં જોસેફના એકાઉન્ટમાં 90 લાખ રૂપિયા ટ્રાન્સફર કર્યા હતા. જોકે ત્યાર પછી રોબર્ટ અને જોસેફ બંને રોકાણ અંગેની કોઈ માહિતી મને આપી ન હતી. બાદમાં રોબર્ટે મને રૂપિયાની બાહેધરી આપી હોવાથી તેની પાસે મેં રકમ માગતા તેને મારી સાથે સ્ટેમ્પ પેપર ઉપર કરાર કર્યો હતો. પરંતુ ત્યારબાદ પણ રકમ ના મળી હતી. ઉપરોક્ત ફરિયાદના આધારે પોલીસે બંને ભેજાબાજની ધરપકડ કરવાના ચક્રો ગતિમાન કર્યા છે.