વડોદરા, તા. 02
વડોદરા શહેરના ડભોઇ રોડ ઉપર એમ. એમ. વોરા શોરૂમની સામે લાકડાના ફર્નિચરનું કામ કરતી કંપનીમાં સવારે આગ ફાટી નીકળી હતી. જોકે આગ વધુ પ્રસરે તે પહેલા ફાયરબ્રિગેડના લાશ્કરો ઘટનાસ્થળે પહોંચી જઈ આગને કાબુમાં લીધી હતી. આગની આ ઘટનામાં કોઇ જાનહાનિ થઇ નથી પરંતુ ફર્નીચરનો સામાન બળીને ખાખ થઈ ગયો હતો.
મળતી માહિતી અનુસાર, ડભોઇ રોડ એમ. એમ. વોરા શોરૂમની સામે વુડન મોલ્ડીગ, આર્ટિકલ, તેમજ સી.એન્.સી. ક્રેવીગ એન્ડ કટીંગનું કામ કરતી કંપની આવેલી છે. આ કંપનીના સંચાલક પ્રિતેશભાઇ કાટવાલા અને રાજ કાટવાલા છે. કંપનીમાં સવારે એકાએક આગ ફાટી નીકળતા ફાયર બ્રિગેડને જાણ કરવામાં આવી હતી. ફાયરબ્રિગેડના લાશ્કરો મેસેજ મળતાની સાથે જ ગણતરીની મિનીટોમા ઘટનાસ્થળે પહોંચી ગયા હતા. અને પાણીનો મારો ચલાવી ગણતરીની મિનિટોમાં આગને કાબૂમાં લઈ લીધી હતી. જોકે આગ સંપૂર્ણ કાબૂમાં આવે તે પહેલા કંપની સ્થિત કેટલો ફર્નીચરનો સામાન બળીને ખાખ થઈ ગયો હતો. ફાયરબ્રિગેડના સૂત્રોએ જણાવ્યું હતું કે, આગના બનાવમાં કોઈ જાનહાની થઈ નથી. તેમજ આગનું ચોક્કસ કારણ જાણવા મળ્યું નથી. પરંતુ આ આગ શોર્ટ સર્કિટના કારણે લાગી હોવાનું પ્રાથમિક રીતે મનાય છે.
