અમદાવાદ,તા.24 માર્ચ 2022,ગુરૂવાર
ફતેવાડીમાં ઝેબા સોસાયટીમાં પાર્ક કરેલી બંધ બોડીની બોલેરો ગાડીમાંથી V-એક્સપ્રેસ કુરિયર કંપનીના ડિલિવરી કરવા માટે રાખેલા સામાનની ચોરી થયાની ઘટના મંગળવારે બની હતી. બંધ બોડીની બોલેરોનું લોક તોડી થયેલી રૂ.1.40 લાખની મત્તાની ચોરી અંગે વેજલપુર પોલીસે ગુનો નોંધી તપાસ હાથ ધરી છે.
નારોલ ખાતે વી-એક્સપ્રેસ કુરિયર કંપનીમાં નોકરી કરતા સુમિત રાજુભાઈ મન્સૂરી ફતેવાડી ઝેબા સોસાયટીમાં રહે છે. મંગળવારે રાત્રે સામાનની ડિલિવરી કરી ઘરે પહોંચેલા સુમિતભાઈ સામાનની ગણતરી કરી ગાડી પાછળ આવેલા શટરને લોક મારી સુઈ ગયા હતા. બીજા દિવસે સવારે આવી જોયું બોલેરોના શટરનું લોક તોડી તસ્કરો કુરિયર કંપનીનો લિફ્ટના પાર્ટ્સનો સામાન રૂ.1,40,570ની મતાનો ચોરી ગયા હતા.
