Jamnagar Hit and Run : જામનગર નજીક દરેડ વિસ્તારમાં તેમજ લાલપુર પંથકમાં જુદા જુદા બે વાહન અકસ્માત સર્જાયા હતા, જે બન્ને હિટ એન્ડ રનના બનાવમાં એક મહિલા સહિત બે વ્યક્તિ કાળનો કોળિયો બની છે, અને બંનેના મૃત્યુ નીપજ્યા છે. સૌપ્રથમ બનાવ દરેડ નજીક બન્યો હતો. જ્યાં ડબલ સવારી બુલેટ મોટરસાયકલને પાછળથી એક ટ્રકના ચાલકે ઠોકરે ચડાવતાં બુલેટ સવાર દંપતિ પૈકી પત્નીનું કરુણ મૃત્યુ નીપજ્યું છે. જ્યારે પતિ ઈજાગ્રસ્ત બન્યા છે. આ ઉપરાંત બીજો અકસ્માત લાલપુર પંથકમાં બન્યો હતો, જ્યાં બે મોટરસાયકલ વચ્ચેના અકસ્માતમાં એક બાઈક ચાલક ખેડૂત યુવાનનું હેમરેજ સહિતની ગંભીર ઇજા થવાથી કરૂણ મૃત્યુ નીપજ્યું છે.
સૌપ્રથમ અકસ્માતનો બનાવ જામનગર નજીક દરેડ હાઈવે રોડ પર બન્યો હતો ત્યાંથી બુલેટ મોટરસાયકલ લઈને પસાર થતાં સંજયભાઈ દુદાભાઈ ખૂંટી નામના 32 વર્ષના યુવાન અને તેના પાછળ બેઠેલા પત્ની શાંતિબહેન (32) કે જેઓના બુલેટ મોટરસાયકલને પાછળથી આવી રહેલા જી.જે.27 કે.જી. 6558 નંબરના ટ્રકના ચાલકે બુલેટને ટક્કર મારી દેતાં બુલેટ માર્ગ ઉપર ફંગોડાયું હતું, અને દંપતી ઇજાગ્રસ્ત બન્યું હતું.
જે પૈકી શાંતીબેનને વધારે ઈજા થતાં 108 નંબરની એમ્બ્યુલન્સ મારફતે સારવાર માટે જામનગરની સરકારી જી.જી. હોસ્પિટલમાં ખસેડવામાં આવ્યા હતા, ત્યાં તેઓનું મૃત્યુ નીપજ્યું હોવાનું જાહેર કરાયું હતું. આ અકસ્માતના બનાવ અંગે ઇજાગ્રસ્ત બુલેટ ચાલક સંજયભાઈ ખૂંટીએ પંચકોશી એ.ડિવિઝન પોલીસ મથકમાં ટ્રકના ચાલક સામે ફરિયાદ નોંધાવી છે.
અકસ્માતનો બીજો બનાવ લાલપુર પંથકમાં બન્યો હતો. લાલપુર તાલુકાના ટેભડા ગામમાં રહેતા અને ખેતી કામ કરતા ભીમશીભાઇ જેતશીભાઈ ડાંગર નામના 38 વર્ષના ખેડૂત યૂવાન પોતાનું મોટરસાયકલ લઈને લાલપુરથી નવી પીપર ગામે વાડીએ જવા માટે રોડ પર સાઈડમાં ઊભા હતા, જે દરમિયાન પાછળથી પુરપાટ ઝડપે આવી રહેલા જી.જે.10 ડી.બી. 7745 નંબરના બાઈકના ચાલકે તેઓના બાઇકને ટક્કર મારી દેતાં અકસ્માત સર્જાયો હતો, અને ખેડૂત યુવાન ભીમશીભાઈ ડાંગર નીચે પટકાઈ પડતાં તેને માથાના ભાગે ગંભીર ઇજા થવાથી સારવાર માટે હોસ્પિટલમાં ખસેડાયા હતા, ત્યાં સારવાર દરમિયાન તેઓનું મૃત્યુ નીપજ્યું છે.
