નડિયાદના મહોળેલ અને કંજરીમાંથી વિદેશી દારૂ સાથે બે શખ્સો ઝડપાયા

જિલ્લાના ગ્રામ્ય વિસ્તારમાં દારૂનો વેપલો

પોલીસે બંને સ્થળેથી વિદેશી દારૂ સહિતની રૂપિયા ૭૩,૧૫૭ની મત્તા જપ્ત કરી બંને સામે ગુનો નોંધ્યો

ચકલાસી પોલીસ બુધવારે સાંજે પેટ્રોલિંગમાં નીકળી હતી. આ દરમિયાન બાતમી મળી હતી કે, મહોળેલ ગામના ઇન્દિરા નગરીમાં રહેતો સુનિલભાઈ દિનેશભાઈ પરમાર વિદેશી દારૂની ચોરી છુપી વેચાણ કરે છે. જેથી પોલીસે રેડ પાડતા મળી આવેલા શખ્સની અટક કરી પૂછપરછ કરતા શખ્સે સુનિલભાઈ દિનેશભાઈ પરમાર હોવાનું જણાવ્યું હતું. તેની પાસેની થેલીમાંથી વિદેશી દારૂની ૨૩ બોટલ (કિંમત રૂ.૭,૦૩૨)ની મળી આવી હતી. આ બનાવ અંગે ચકલાસી પોલીસે ગુનો નોંધી કાર્યવાહી હાથ ધરી હતી. જ્યારે બીજા બનાવમાં વડતાલ પોલીસ બુધવારની સાંજે પેટ્રોલિંગમાં નીકળી હતી, ત્યારે બાતમી મળી હતી કે, પેટલાદ તાલુકાના ચાંગામાં રહેતો કિસન પરમાર કંજરી તક્ષશિલા સોસાયટીમાં મકાન નંબર ૧૮ ભાડે રાખી તેમાં વિદેશી દારૂ સંતાડી રાખી વેચાણ કરે છે. જેથી પોલીસે રેડ પાડતા કિશનભાઇ રમણભાઈ પરમારને મકાનમાંથી વિદેશી દારૂ-બિયર ટીન નંગ ૨૧૦ (કિંમત રૂ.૨૬,૨૫૦) તેમજ દારૂના ક્વાર્ટર નંગ ૨૭૯ (કિંમત રૂ.૩૪,૮૭૫)ના તેમજ એક મોબાઈલ (કિંમત રૂ.૫,૦૦૦)નો મળી કુલ રૂ.૬૬,૧૨૫નો મુદ્દામાલ કબજે કર્યો હતો. આ બનાવ અંગે વડતાલ પોલીસે પ્રોહિબિશનનો ગુનો નોંધી વધુ કાર્યવાહી હાથ ધરી હતી.