નારેશ્વર રોડ ઉપર બેફામ ડમ્પરે ઝાડ તોડી પાડતા બે ને ઇજા, મકાન બચી ગયું...રેતીખનન સામે રોષ ફાટ્યો

Vadodara Accident : વડોદરા જિલ્લાના યાત્રાધામ નારેશ્વર ખાતે રેતી ખનન કરતા ડમ્પરે વધુ એક અકસ્માત કરતા સામે લોકોનો ભારે રોષ ફાટી નીકળ્યો છે. પરિણામે મોડી રાત્રે લોકો અને પોલીસ વચ્ચે ભારે રકઝક થઈ હતી. લોકોએ તાકીદે રેતી ખનન બંધ કરાવવા માંગણી કરી હતી.

ડીઝલ ચોરીના મુદ્દે ડ્રાઇવરોને ઊંધા લટકાવી મારનાર ધારાસભ્યના પુત્ર સામે ફરિયાદ થઈ હતી. વડોદરાના નારેશ્વર ખાતે બેફામ રીતે ચાલતા રેતીખનનને કારણે અકસ્માતના વારંવાર બનાવો બનતા હોવાથી તેમજ રસ્તાઓ તૂટી જતા હોવાથી લોકોમાં ભારે રોષની લાગણી વ્યાપી છે. નોંધનીય છે કે તાજેતરમાં જ ડમ્પરના બે ડ્રાઇવરને ધારાસભ્યના પુત્ર તેમજ તેના સાગરીતોએ બીજલ ચોરીનો આરોપ મૂકી ઊંધા લટકાવીને માર મારતા ભારે હોબાળો મચ્યો હતો અને પોલીસે ગુનો નોંધવો પડ્યો હતો. તો સામે બે ડ્રાઇવર સામે ડીઝલ ચોરીનો વડુ પોલીસ સ્ટેશનને ગુનો નોંધાયો હતો.

મધરાતે ડમ્પરે લીમડાનું ઝાડ તોડી નાખતા બેને ઇજા થઈ મકાન બચી ગયું, ડ્રાઇવરને ફટકાર્યો 

નારેશ્વર અને આસપાસના વિસ્તારમાં આખો દિવસ રેતી ખનન કરી દોડતા ડમ્પરોને કારણે ખેતીવાડીને પણ મોટું નુકસાન થઈ રહ્યું છે. જ્યારે અકસ્માતના વારંવાર બનાવો બને છે અને એક ડઝનથી વધુ લોકોના અત્યાર સુધીમાં મૃત્યુ થયા છે. દરમિયાનમાં ગઈ રાત્રે 2 વાગ્યાના અરસામાં એક ડમ્પર ચાલકે થિયરીંગ પરનો કાબુ ગુમાવતા ડમ્પર ઝાડ સાથે ભટકાયું હતું. ધડાકાભેર ઝાડ તૂટતા લોકો ભેગા થઈ ગયા હતા અને ડ્રાઇવરની ધોલાઈ કરી હતી.

પોલીસ સાથે જીભાજોડી, ટોળાના રોષ વચ્ચે ઇજાગ્રસ્ત ડ્રાઇવરને સારવાર માટે લઈ જવાયો 

બનાવને પગલે પોલીસ દોડી આવતા ડ્રાઇવરને લોકોના મારમાંથી બચાવ્યો હતો. જેથી લોકોની પોલીસ સાથે ઉગ્ર બોલાચાલી પણ થઈ હતી અને રેતીખનન બંધ કરાવવા સતત માગણી કરી હતી. પોલીસે લોકોના આક્રોશ વચ્ચે ડ્રાઇવરને માંડ માંડ બચાવી લઈ સારવાર માટે મોકલ્યો હતો.