ઉત્તરાયણ પૂર્વે પ્રતિબંધિત ચાઈનીઝ દોરી સાથે બે ઝડપાયા

ઉત્તરાયણ પર્વને પગલે શહેરમાં પ્રતિબંધિત ચાઈનીઝ દોરીના વેચાણ સામે પોલીસ દ્વારા કાર્યવાહી શરુ કરવામાં આવી છે. આ દરમિયાન કપુરાઈ પોલીસે શહેરના ધનીયાવી રોડ પરથી પ્રતિબંધિત ચાઈનીઝ દોરીના જથ્થા સાથે બે શખ્સોને ઝડપી પાડી કુલ રૂ. ૧૩ હજારની કિંમતની ૨૬ રીલ કબજે કરી છે.

પોલીસને ગઈકાલે રાત્રે માહિતી મળી હતી કે, શહેરના ધનીયાવી રોડ પર બે શખ્સો પ્રતિબંધિત ચાઈનીઝ દોરી લઈને જઈ રહ્યા છે. મળેલી માહિતીના આધારે કપુરાઈ પોલીસ ટીમે ધનીયાવી રોડ સ્થિત સૂર્યનગર પાસેથી ચાઈનીઝ દોરી ભરેલા થેલાં સાથે હિતેશ મનહર ડાભી (રહે. અલ્હાદપુર ગામ, વડોદરા) અને રૂપેન્દ્ર જયલાલ ચૌધરી (રહે. આદર્શનગર, તરસાલી બાયપાસ, વડોદરા) ને ઝડપી પાડી તેમની પાસેથી રૂ. ૧૩ હજારની કિંમતની ૨૬ નંગ ચાઈનીઝ દોરીની રીલો કબજે કરી બંને આરોપીઓ સામે જાહેરનામા ભંગ બદલ ગુનો નોંધી આગળની કાર્યવાહી હાથ ધરી છે.

ઉલ્લેખનીય છે કે, ચાઈનીઝ દોરી અત્યંત જોખમી હોવાથી પતંગ કાપવાની સાથે માનવી અને પક્ષીઓના ગળા પણ ચીરી નાખતી હોય છે. આ કારણે સરકાર દ્વારા તેના પર સંપૂર્ણ પ્રતિબંધ મૂકવામાં આવ્યો છે. તેમ છતાં, કેટલાક વેપારીઓ કમાણીની લાલચમાં નિયમોને નેવે મૂકીને તેનું વેચાણ કરતા હોવાની ઘટનાઓ સામે આવી રહી છે.