ભરૂચ શહેર-જિલ્લામાં અકસ્માતની બે ઘટનાઓ, એકનું મોત, એકને ગંભીર ઈજા પહોંચી

Bharuch Accident : ભરૂચ શહેર-જિલ્લામાં અકસ્માતની બે ઘટનાઓ સામે આવી છે. જેમાં ભરૂચ-ચાવજ રોડ પર બે બાઈકો ભટકાતા એકનું મોત નીપજ્યું હતું. જ્યારે આમદડા-નવેઠા ગામ માર્ગ ઉપર કન્ટેનરે બાઈકને અડફેટે લેતા બાઈક સવારને ગંભીર ઈજાઓ પહોંચી હતી.

 ગઈકાલે બપોરે ભરૂચ ખાતે સાધના શાળાની પાસે રહેતા 65 વર્ષીય જયેશભાઈ કાંતિભાઈ પટેલ બાઈક લઈ ચાવજ ખાતેથી કામ પતાવી ઘરે પરત ફરી રહ્યા હતા. તે સમયે ભરૂચ સાવજ રોડ પર રંગુન હોસ્પિટલ નજીક સામેથી આવી રહેલ બાઈક સાથે તેમનો અકસ્માત થયો હતો. જેમાં જયેશભાઈને માથાના ભાગે ગંભીર ઈજા પહોંચતા સારવાર અર્થે નારાયણ હોસ્પિટલ ખસેડાયા હતા. જ્યાંથી તેઓને વડોદરાની ખાનગી હોસ્પિટલ ખાતે રિફર કરાયા હતા. જ્યાં રાત્રે ટૂંકી સારવાર દરમ્યાન તેમનું મોત નીપજ્યું હતું. બનાવ સંદર્ભે ફરિયાદના આધારે ભરૂચ સી ડિવિઝન પોલીસે અજાણ્યા બાઈક ચાલક વિરુદ્ધ ગુનો નોંધી કાયદેસરની કાર્યવાહી હાથ ધરી છે. બીજા બનાવમાં ગઈકાલે વહેલી સવારે હરેશ મહેન્દ્રભાઈ વસાવા (રહે-કરમાળ ગામ, ભરૂચ ) ભેંસલી ખાતે ખાનગી કંપનીમાં નોકરી જવા ભુવા ગામ ખાતે રહેતા મિત્ર હિતેશભાઈ પટેલની બાઈક લઈ સાથે નીકળ્યા હતા. બાઈક હરેશભાઈ ચલાવતા હતા અને હિતેશભાઈ પાછળ બેઠા હતા. તે સમયે આમદડા અને નવેઠા હાઈવેનું સમારકામ ચાલુ હોય રસ્તો વન વે કરવામાં આવ્યો છે. અહીંથી પસાર થતાં સમયે એક કન્ટેનર ચાલકે બાઈક સવાર બંનેને અડફેટે લીધા હતા. જેમાં હરેશભાઈનો બચાવ થયો હતો. જ્યારે હિતેશભાઈને મોઢાના તથા પગના ભાગે ફ્રેક્ચર સાથે ગંભીર ઇજાઓ પહોંચી હતી. જેથી તેઓને સારવાર અર્થે 108 એમ્બ્યુલન્સ મારફતે ભરૂચ સિવિલ હોસ્પિટલ ખસેડાયા હતા. બનાવ સંદર્ભે ફરિયાદના આધારે ભરૂચ રૂરલ પોલીસે કન્ટેનર ચાલકની નંબરના આધારે શોધખોળ  હાથ ધરી છે.