એમડી મોટર્સએ બોગસ ફિટનેસ સર્ટિફિકેટ આપ્યા : ગાંધીનગર ટ્રાન્સપોર્ટ કચેરીએ લાઇસન્સ છ મહિના માટે સસ્પેન્ડ કર્યું

Vadodara : વડોદરા શહેર નજીક સાકરદા ગામમાં આવેલી એમડી મોટર્સ દ્વારા બોગસ ફિટનેસ સર્ટિફિકેટ આપવામાં આવતા ટ્રાન્સપોર્ટ કચેરી, ગાંધીનગર દ્વારા એજન્સીનું લાઇસન્સ છ મહિના માટે સસ્પેન્ડ કરવામાં આવ્યું છે. આ પગલાથી અન્ય મોટર સંચાલકોમાં ફફડાટ ફેલાયો છે.

 ટ્રાન્સપોર્ટ કચેરીને માહિતી મળી હતી કે, એમડી મોટર્સના સંચાલક દ્વારા ફિઝિકલ વાહનની હાજરી વગર જ વિવિધ વાહનોને ફિટનેસ સર્ટિફિકેટ આપવામાં આવી રહ્યા છે. આ માહિતીના આધારે અધિકારીઓએ સ્થળ પર તપાસ હાથ ધરી હતી. તપાસ દરમિયાન કુલ 29 ભારદારી વાહનોના ફિટનેસ સર્ટિફિકેટ નિયમોનું પાલન કર્યા વિના જારી કરાયા હોવાનું બહાર આવ્યું હતું. આ ગેરરીતીઓના આધારે ટ્રાન્સપોર્ટ વિભાગે એમડી મોટર્સનું લાઇસન્સ છ મહિના માટે સસ્પેન્ડ કરી દીધું છે. કમિશનર ઓફ ટ્રાન્સપોર્ટ, ગાંધીનગર દ્વારા આ આખી કાર્યવાહી અંગે વડોદરા પ્રાદેશિક વાહનવ્યવહાર કચેરી, દરજીપુરાને જાણ કરવામાં આવી છે. હવે પ્રાદેશિક કચેરી દ્વારા સમલગ્ન દસ્તાવેજોની તપાસ કરવામાં આવશે અને જરૂરી પુરાવા મળતાં સ્થાનિક પોલીસ સ્ટેશનમાં સંબંધિત સંચાલક વિરુદ્ધ કાયદેસર કાર્યવાહી માટે ફરિયાદ નોંધાવાશે, તેવી માહિતી મળી રહી છે.