ટ્રેનમાં મુસાફરી કરતા મુસાફરની ઊંઘનો લાભ લઈ 3 મોબાઇલ અને રોકડ ભરેલુ પર્સ ચોરી

Vadodara : મોદાન રેલવે સ્ટેશનથી દાદર જવા માટે પરિવાર સાથે ટ્રેનમાં મુસાફરી કરી રહેલા મુસાફરનો રૂ.65 હજારની કિંમતના ત્રણ મોબાઇલ ફોન અને રોકડ ભરેલો પર્સ અજાણ્યા ચોરે ઊંઘનો લાભ લઈ ચોરી કરી ફરાર થઈ ગયો હતો. ટ્રેન વડોદરા રેલવે સ્ટેશન નજીક પહોંચતા ચોરીની જાણ થતાં ફરિયાદ નોંધાવી પોલીસ દ્વારા તપાસ હાથ ધરવામાં આવી છે.

મુંબઈ ખાતે રહેતા ખગારસિંગ કલ્યાણસિંગ પોતાની પત્ની અને પુત્રી સાથે તા. 06 જૂનના રોજ મોદાન રેલવે સ્ટેશનથી દાદર જવા માટે 12489 બિકાનેર-દાદર એક્સપ્રેસ ટ્રેનના B/2 કોચમાં સીટ નં. 1, 2, 7 અને 8 પર મુસાફરી કરી રહ્યા હતા. મુસાફરી દરમિયાન તેમણે પુત્રીના ગ્રે કલરના સાઈડ પર્સમાં પોતાના, પત્ની અને પુત્રીના મોબાઇલ ફોન તેમજ રોકડ રકમ મૂકી સીટ પર રાખ્યો હતો.

રાત્રે આશરે 11:54 વાગ્યે પરિવાર ઊંઘી ગયો હતો. બીજા દિવસે તા.07 જૂનના રોજ સવારે આશરે 6:30 વાગ્યે ટ્રેન વડોદરા રેલવે સ્ટેશન પહોંચે તે પહેલાં જાગીને તપાસ કરતા સીટ પર રાખેલો ગ્રે કલરનો સાઈડ પર્સ ગાયબ હોવાનું જણાયું હતું. ચોરાયેલા મુદ્દામાલમાં 3 મોબાઇલ તેમજ ભારતીય ચલણની રૂ.2,000 રોકડનો સમાવેશ થાય છે. ગઠિયો મળીને રૂ.65 હજારની મત્તા અજાણ્યા ચોરી કરી ફરાર થઈ ગયો હતો. આ બનાવ અંગે પોલીસે ગુનો નોંધી વધુ તપાસ શરૂ કરી છે.