કપડવંજના મીના બજાર રોડ ઉપર ટ્રાફિકની સમસ્યાથી ભારે હાલાકી

કપડવંજ : કપડવંજના મીના બજાર રોડ ઉપર બેંક ઓફ ઇન્ડિયા નજીક ટ્રાફિક સમસ્યા સર્જાતા બેંકમાં અવરજવર ?કરતા ગ્રાહકોને ભારે હાલાકી વેઠવી પડી રહી છે. ઉપરાંત બેંકની બહાર એ.ટી.એમ નજીક કાયમી પાણીપુરીની લારીનો અડીંગો રહેતા ગ્રાહકોને ભારે મુશ્કેલી વેઠવી પડી રહી છે. છતાંય તંત્ર દ્વારા આંખ આડા કાન કરવામાં આવી રહ્યા છે. મીના બજાર વિસ્તારથી નટરાજ ટોકીઝ રોડ ઉપર આડેધડ રસ્તા વચ્ચે ટુ વિલ્હર ફોર વ્હીલર વાહનો મુકવામાં આવતા હોય છે, ત્યારે આ રોડ ઉપર હોસ્પિટલો આવેલી હોવાથી દર્દીઓને એમ્બ્યુલન્સ મારફતે લઈ જતી વેળાએ તેમજ આગ લાગતાં ફાયર ફાઈટરને પણ પસાર થવું મુશ્કેેલ બને છે. માટે કાયમી ધોરણે ટ્રાફિક પોલીસ પોઈન્ટ મુકવામાં આવે તેવી માંગ ઉઠવા પામી છે.