તોરણીયાના એન્જિનિયરે મોબાઇલમાં લિંક ખોલતા 2.14 લાખ ઉપડી ગયા

- ગઠિયાએ તબક્કાવાર રૂપિયા સેરવી લીધા 

- કપડાની ડિઝાઇન જોવાની લાલચમાં એન્જિનિયર સાથે સાયબર ફ્રોડ થતાં પોલીસ ફરિયાદ નોંધાવી 

નડિયાદ : મહુધાના તોરણીયા ગામના એક સિવિલ એન્જિનિયરે મોબાઈલ પર આવેલી કપડાની જાહેરાતની લિંક ખોલતા તેમના બેંક એકાઉન્ટમાંથી રૂ. ૨,૧૪,૭૦૦ ઉપડી ગયા હતા. અજાણ્યા ગઠિયાએ વિશ્વાસઘાત કરી જુદા જુદા ટ્રાન્જેક્શન દ્વારા રકમ સેરવી લેતા મહુધા પોલીસે ગુનો નોંધી તપાસ હાથ ધરી છે. 

મહુધા તાલુકાના તોરણીયા ગામે રહેતા અને રન્ના કન્સ્ટ્રક્શન કંપનીમાં એન્જિનિયર તરીકે ફરજ બજાવતા અભિ કિરીટભાઈ પટેલ સાથે ઓનલાઇન છેતરપિંડીનો બનાવ બન્યો છે. ગત સપ્ટેમ્બરમાં અભિભાઈ નડિયાદ ખાતે કન્સ્ટ્રક્શન સાઈટ પર હતા ત્યારે તેમના મોબાઈલમાં કપડાના વેચાણ અંગેની એક જાહેરાતની લીંક આવી હતી. આ જાહેરાતની લિંક ઓપન કરી તેઓ કપડાની ડિઝાઇન અને કલર જોઈ રહ્યા હતા.

થોડી વાર બાદ સાઈટ પર એ.સી.ના પેમેન્ટ માટે તેમણે ગુગલ પે દ્વારા ૫૦,૦૦૦ રૂપિયા ટ્રાન્સફર કરવાનો પ્રયાસ કર્યો હતો.ત્યારે ખાતામાં અપૂરતું બેલેન્સ હોવાનું જણાયું હતું. બેંક સ્ટેટમેન્ટ ચેક કરતા માલૂમ પડયું કે શંકાસ્પદ લિંક ઓપન કર્યા બાદ ગઠિયાઓએ તેમના ખાતામાંથી તબક્કાવાર કુલ રૂ. ૨,૧૪,૭૦૦ ટ્રાન્સફર કરી લીધા હતા. સોશિયલ મીડિયાની લિંક પર વિશ્વાસ રાખવો એન્જિનિયરને ભારે પડયો છે. આ મામલે અભિભાઈએ મહુધા પોલીસ મથકે અજાણ્યા ગઠિયા સામે ફરિયાદ નોંધાવતા પોલીસે સાયબર ફ્રોડનો ગુનો નોંધી ટેકનિકલ સર્વેલન્સના આધારે તપાસ શરૂ કરી છે.