વડોદરામાં સમા મામલતદાર કચેરી ચાર રસ્તા અકસ્માતનો બ્લેક સ્પોટ બન્યો, ત્રણ દિવસમાં ત્રણ બનાવ

Vadodara Accident : વડોદરામાં સમા મામલતદાર કચેરી વિસ્તારના ચાર રસ્તા અકસ્માતનો ઝોન બની ગયો છે. અહીં છેલ્લા ત્રણ દિવસમાં અકસ્માતના એક પછી એક ત્રણ બનાવો બન્યા હતા. જેમાં એક બનાવની પોલીસ ફરિયાદ નોંધાઈ છે.

વડોદરા પોલીસ દ્વારા શહેરમાં ડભોઇ રોડ ત્રણ રસ્તા, અટલબિજ, અકોટા બ્રિજ અને પંડ્યા બ્રિજ જેવા વિસ્તારોમાં અકસ્માતના બનાવો ઘટાડવા માટે બ્લેક સ્પોટ જાહેર કરી પગલા લેવામાં આવ્યા છે. જેમાં કાંઈક અંશે અસર પણ જોવા મળી છે.

સમા મામલતદાર કચેરી બહારના ચાર રસ્તા પણ અકસ્માતના નવા ઝોન તરીકે લોકો જોઈ રહ્યા છે. છેલ્લા ત્રણ દિવસમાં અકસ્માતના એક પછી એક ત્રણ બનાવો બનતા ચર્ચાનો વિષય બન્યો હતો. આ બનાવના વિડીયો પણ વાયરલ થયા હતા. સારાનસીબે એક જ ઢબના ત્રણે ત્રણ બનાવમાં કોઈ ગંભીર જાનહાની થઈ નથી.

 જોકે ત્રણ બનાવો પૈકી સમા પોલીસ સ્ટેશનમાં માત્ર એક જ ફરિયાદ નોંધાઈ છે. જેમાં નીતિન રાઠોડ નામના બાઈક ચાલકે અન્ય એક વાહન ચાલક દ્વારા અકસ્માત કરી ઇજા પહોંચાડવામાં આવી હોવાની ફરિયાદ કરી છે.