Vadodara Car Fire : વડોદરાના વારસિયા વિસ્તારમાં ગઈ મોડી રાત્રે પાર્ક કરેલી ત્રણ કાર આગમાં લપેટાતા દોડધામ મચી હતી. બનાવ અંગે પોલીસે તપાસ હાથ ધરી છે.
વારસિયા વિસ્તારમાં આરટીઓ પાછળ આવેલી અંબિકા નગર સોસાયટીના પ્લોટમાં ગઈ રાત્રે રહીશોએ કાર પાર્ક કરી હતી તે દરમિયાન અચાનક ફટાકડા જેવો અવાજ આવતા આસપાસના રહીશો જાગી ગયા હતા.
લોકોએ બહાર નીકળી જોયું તો થાર કારમાં આગળથી અને તેની આસપાસની બે કાર પણ આગમાં લપેટાયેલી હતી. જેથી ફાયર બ્રિગેડને જાણ કરાતા પાણીગેટની ટીમ દ્વારા પોણો કલાકની જહેમત બાદ આગને કાબુમાં લેવામાં આવી હતી.
ઉપરોક્ત બનાવના કારણ અંગે રહસ્યના વમળો સર્જાયા છે. પોલીસ પણ સ્થળ પર આવી ગઈ હતી અને બનાવનું કારણ જાણવા સોસાયટીના સીસીટીવી ફૂટેજ મેળવવા તજવીજ કરી હતી.
