તળાજા તાલુકાના બેલા ગામે રહેણાંકી મકાનમાં ચોરી

અલંગ પોલીસ મથકમાં ગુનો નોંધાયો

ઘરના કબાટમાં રાખેલા સોના-ચાંદીના દાગીના સહિત કુલ રૂ.૧.૭૮ લાખની ચોરી

તળાજા તાલુકાના બેલા ગામે રહેતા રાજુભાઈ રમણીકભાઈ બારૈયા તેમના ગામમાં હિંમતભાઈ ધાંધલ્યાના ઘરે લગ્ન લીધેલા હોવાથી આજે સવારે ૯.૩૦ કલાકના અરસામાં ઘરે તાળું મારીને પરિવાર સાથે જમવા માટે ગયા હતા અને બપોરે ૧૧.૩૦ કલાકે ઘરે પરત આવ્યા હતા. આ સમયગાળા દરમિયાન કોઈ અજાણ્યા ઈસમો તેમના ઘરમાં ગેરકાયદેસર પ્રવેશી તેના ઘરના એક રૂમમાં રાખેલા લોખંડના કબાટની તિજોરીમાં રાખેલા રૂ.૧,૭૮,૩૯૭ની કિંમતના સોના અને ચાંદીના ઘરેણાં ચોરી ગયા હતા. બનાવ અંગે રાજુભાઈ રમણીકભાઈ બારૈયાએ અલંગ પોલીસ મથકમાં અજાણ્યા શખ્સો વિરૂદ્ધ ફરિયાદ નોંધાવતા પોલીસે ગુનો નોંધી આગળની કાર્યવાહી હાથ ધરી છે.