Vadoara Corporation : વડોદરામાં મકરપુરા એસ.ટી. ડેપો પાસે રસ્તો પહોળો કરવાની કામગીરીમાં મ્યુ. કોર્પોરેશનના વિભાગો અને કોન્ટ્રાક્ટર વચ્ચે સંકલનના અભાવે ફરી એક વખત પીવાના પાણીની લાઈનમાં ભંગાણથી પાણીનો વેડફટ સામે આવ્યો છે.
વડોદરા શહેરના મકરપુરા એસ.ટી. ડેપોની સામેના ભાગે મ્યુ. કોર્પોરેશન દ્વારા રસ્તો પહોળો કરવાની કામગીરી હાથ ધરાઈ છે. આ દરમિયાન કોર્પોરેશનના વિવિધ વિભાગો વચ્ચે સંકલનના અભાવે પાણીની લાઈનમાં ભંગાણ સર્જાતા વિપુલ માત્રામાં શુદ્ધ પાણીનો જથ્થો વેડફાયો હતો. એક તરફ શહેરના અનેક વિસ્તારોમાં પાણીનો કકડાટ જોવા મળી રહ્યો છે અને બીજી તરફ અવારનવાર આ પ્રકારે પાણીની લાઈનમાં ભંગાણ થવાથી પાણીનો વેડફાટ થતા મ્યુ. કોર્પોરેશનની કામગીરી સામે સવાલો ઊભા થાય છે. રસ્તાની કામગીરી દરમિયાન સર્જાયેલા આ ભંગાણથી લાખો લિટર પાણી વહી જતા સ્થાનિક રહીશનું કહેવું હતું કે, લીકેજના કારણે પાણી વેડફાઈ જતા અડધા મકરપુરા ગામને પાણી મળ્યું નથી, આ અંગે કોન્ટ્રાક્ટરની બેદરકારી સ્પષ્ટ જણાઈ આવે છે, જેથી કોન્ટ્રાક્ટર સામે દંડાત્મક પગલાં ભરવા જોઈએ.
