તા.૩થી માધ્યમિક શાળાઓમાં પ્રથમ પરીક્ષાનો પ્રારંભ થશે

વડોદરા,વડોદરા શહેર જિલ્લામાં ધો.૯ થી ૧૨ની ચાલુ શૈક્ષણિક સત્રની દિવાળી પૂર્વેની પ્રથમ પરીક્ષા તા.૩થી તા.૧૩ ઓકટો. સુધી યોજાશે અને ત્યાર બાદ તા.૧૫ થી ૨૧ દિવસનું દિવાળી વેકેશન શરૃ થશે.

ગુજરાત માધ્યમિક અને ઉચ્ચતર માધ્યમિક શિક્ષણ બોર્ડના પરિપત્ર અનુસાર આ પરીક્ષા માટે જૂન માસથી સપ્ટેમ્બર સુધીનો અભ્યાસક્રમ અમલમાં રહેશે.એ અગાઉ પરીક્ષા તા.૧૧ થી ૨૦ સપ્ટેમ્બર સુધી યોજવા સૂચના અપાઇ હતી, પરંતુ આ તારીખોમાં ફેરફાર કરવા માટે શૈક્ષણિક સંઘો દ્વારા રજૂઆત કરવામાં આવી હતી. તા.૧૭ જુલાઇએ શૈક્ષણિક સમિતિની બેઠકમાં પ્રથમ પરીક્ષાની તારીખોમાં ફેરફાર કરવા સરકારની મંજૂરી મેળવવા નિર્ણય કરાયો હતો. તા.૨૪ જુલાઇએ સરકારની મંજૂરી મળી હતી. જે મુજબ તા.૩ થી ૧૩ ઓકટો. સુધી પરીક્ષા યોજવાનું નક્કી થયું હતું.

વડોદરા શહેર-જિલ્લામાં આશરે ૪૫૦ માધ્યમિક અને ઉચ્ચતર માધ્યમિક  શાળાઓ છે. જેના અંદાજે ૨ લાખ વિદ્યાર્થીઓ આ પરીક્ષા આપશે.

હાલમાં નવરાત્રિ મહોત્સવ ચાલુ છે અને બાળકો પણ નવરાત્રિનો તહેવાર માણી રહ્યા હોવાથી રોજ શાળાએ આવવું ન પડે તે માટે શાળાઓમાં હાલ મીની વેકેશન આપી દેવાયું છે. વિદ્યાર્થીઓને હવે સીધું પરીક્ષા આપવા માટે જ શાળાએ આવવાનું રહેશે.

પ્રાથમિક શાળાઓમાં પણ તા.૬થી પ્રથમ પરીક્ષા શરૃ

  વડોદરા,

વડોદરા શહેર-જિલ્લામાં ૧૧૦૦થી વધુ પ્રાથમિક શાળાઓ છે. આ શાળાઓમાં પણ પ્રથમ સત્રાંત કસોટી તા.૬થી શરૃ થશે અને તા.૧૪ના રોજ પૂર્ણ થશે. વડોદરા જિલ્લામાં સરકારી ૧૦૦૦ પ્રાથમિક શાળાઓ છે. જ્યારે વડોદરામાં નગર પ્રાથમિક શિક્ષણ સમિતિની ૧૨૨ શાળાઓ છે. પ્રાથમિક શાળાઓના ધો. ૩ થી ૮ સુધીના બાળકો આ પરીક્ષા આપશે. પ્રાથમિક શાળાઓમાં તા.૧૬થી દિવાળી વેકેશન શરૃ થશે.