24 કલાકની અંદર કચ્છમાં આગના ત્રણ બનાવો
પીજીવીસીએલ કચેરીની અંદર ઝાડી ઝાખરામાં લાગેલી આગથી વેસ્ટ કેબલ સળગ્યા, લુણવામાં પણ શોર્ટ સર્કિટથી રહેણાંક મકાનમાં ઘરવખરી બળીને ખાખ
ભુજમાં એરફોર્સ રોડ પર ગત મોડી રાત્રીના બે વાગ્યાના અરસામાં ટ્રક નં.જી.જે.૧૨ બી.ઝેડ.૩૩૫૧માં આગ લાગી હતી. જેને બુઝાવવા ભુજ ફાયર ટીમ તાત્કાલીક ઘટના સ્થળે દોડી ગઈ હતી અને આગને કાબુમાં લીધી હતી. મીઠા ભરેલા ટ્રકમાં આગ લાગતા એરફોર્સ વિસ્તારમાં ચિંતા પ્રસરી હતી. તો નવાઈની વાત એ છે કે, રાત્રીના બે વાગ્યાના અરસામાં લાગેલી આગને બુઝાવાઈ હતી પરંતુ આજે પુનઃ સાંજે પાંચ વાગ્યાના અરસામાં ફરી એ જ ટ્રકમાં આગ લાગી હતી. જેના પગલે આગને કાબુમાં લેવા નજીકમાંથી એરફોર્સ ના ફાયર બ્રિગેડને દોડી આવવું પડયું હતું. આગ લાગવા પાછળનું કારણ જણાવતા સચિનભાઈ પરમારે જણાવ્યું હતું કે, ઉનાળાના દિવસો શરૂ થઈ ગયા હોવાથી ટ્રકમાં હીટ વધી ગઈ હતી. જેના કારણે આગ લાગી હતી.
આગનો બીજો બનાવ આજે બપોરના ૨ વાગ્યાના અરસામાં ભુજ શહેરની વચ્ચોવચ્ચ પીજીવીસીએલ કચેરીની અંદર જાડી- ઝાખરામાં પડેલા વેસ્ટ કેબલમાં આગ લાગી હતી જેના પગલે દોડધામ મચી હતી. ભુજ ફાયર વિભાગને તાબડતોબ પહોંચીને આગને વધુ પ્રસરતા અટકાવી હતી. પીજીવીસીએલ કચેરીમાં આગનો બનાવ ગંભીર હોઈ તંત્રમાં ચિંતા પ્રસરી હતી. આ ઉપરાંત આગનો ત્રીજો બનાવ ભચાઉ તાલુકાના લુણવા ગામે બન્યો હતો. જયાં એક રહેણાંક મકાનમાં શોર્ટ સર્કિટના કારણે આગ લાગતા ભચાઉ ફાયર ટીમે તાત્કાલીક ઘટના સ્થળે પહોંચીને આગને ઓલાવી હતી. આમ, છેલ્લા ૨૪ કલાકની અંદર આગના ત્રણ બનાવો બન્યા હતા.
