શહેરની પાર્કિંગ વ્યવસ્થાને સંપૂર્ણપણે ડિજિટલ બનાવાશે, અમદાવાદમાં AI આધારીત સ્માર્ટ પાર્કિંગ વ્યવસ્થા ગોઠવવા કવાયત

અમદાવાદ,મંગળવાર,17 ફેબ્રુ,2026

અમદાવાદમાં પાર્કિંગ વ્યવસ્થાને સંપૂર્ણપણે ડિજિટલ બનાવાશે.મ્યુનિસિપલ કોર્પોરેશનના સ્માર્ટસિટી અમદાવાદ ડેવલપમેન્ટ લિમિટેડ દ્વારા એ.આઈ.બેઝ વિડિયો એનાલિટીકસ પ્લેટફોર્મ આધારીત સ્માર્ટ પાર્કિંગ વ્યવસ્થા ગોઠવવા ટેન્ડર પ્રક્રીયા કરાઈ છે.શહેરના તમામ પાર્કિંગ સ્થળોએ ઓકયુપન્સી ડિટેકશન માટે એ.આઈ. કેમેરા ઈન્સ્ટોલ કરાશે.હાલમાં  પાર્કિંગ સ્થળોએ આ પ્રકારની કોઈ વ્યવસ્થા જોવા મળતી નથી.

મ્યુનિસિપલ કોર્પોરેશન દ્વારા ઓન સ્ટ્રીટ, ઓફ સ્ટ્રીટ તથા મલ્ટી લેવલ પાર્કિંગ  એમ અલગ અલગ સ્થળે  ટુ વ્હીલર અને ફોર વ્હીલર  પાર્ક કરાવવામા આવી રહયા છે. મોટાભાગના પાર્કિંગ પે એન્ડ પાર્ક પધ્ધતિથી વાહન પાર્ક કરાવવા કોન્ટ્રાકટરોને આપવામા આવ્યા છે.શહેરમાં છેલ્લા કેટલાક વર્ષોથી વાહનોની સંખ્યામાં સતત વધારો થઈ રહયો છે.શહેર બહારથી પણ રોજ મોટી સંખ્યામાં વાહનોની અવરજવર થતી હોય છે. આ કારણથી શહેરમાં પાર્કિંગ વ્યવસ્થા સતત ખોરવાયેલી જોવા મળી રહી છે.પ્રદૂષણમાં વધારો થવાની સાથે વાહન ચાલકો લાંબા સમય સુધી તેમના વાહન પાર્ક કયાં કરવા એ માટેની જગ્યા શોધતા જોવા મળે છે. આ  પરિસ્થિતિને ધ્યાનમાં રાખીને શહેરમાં સ્માર્ટ અને ટેકનોલોજી આધારીત પાર્કિંગ વ્યવસ્થા અમલમાં મુકવા નિર્ણય કરાયો છે. આ સિસ્ટમ કાર્યરત થવાથી શહેરીજનોનો સમય અને ઈંધણ બંનેની બચત થઈ શકશે.

૧૨ હજારથી વધુ કાર,૩૫ હજારથી વધુ ટુ વ્હીલર રિઅલ ટાઈમમાં પાર્ક થઈ શકશે

અમદાવાદમાં મ્યુનિસિપલ કોર્પોરેશન દ્વારા ત્રણ પ્રકારે વાહન પાર્ક કરાવવામા આવી રહયા છે. એ.આઈ.આધારીત સ્માર્ટ પાર્કિંગ વ્યવસ્થા ગોઠવાયા પછી ૧૨ હજારથી વધુ કાર અને ૩૫ હજારથી વધુ ટુ વ્હીલર રિઅલ ટાઈમમા વાહન ચાલકો પાર્ક કરી શકશે.

પાર્કિંગ સ્પેસ    ટુ વ્હીલર(ક્ષમતા)       ફોરવ્હીલર(ક્ષમતા)

ઓન સ્ટ્રીટ      ૧૮૭૭૪                      ૬૯૩૬

ઓફ સ્ટ્રીટ      ૧૪૫૧૭                        ૧૦૦૩

મલ્ટીલેવલ     ૧૯૪૬                          ૧૪૫૯

શહેરીજનોને શુ સુવિધા મળશે?

-ઓન સ્ટ્રીટ  પાર્કિંગ માટે કયુઆર કોડ આધારીત ડિજિટલ પેમેન્ટ સિસ્ટમ અને ઓફ સ્ટ્રીટ પાર્કિંગ માટે ફુલ્લીઓટોમેટેડ પેમેન્ટ સિસ્ટમ અમલમા મુકાશે.

-કોર્પોરેશન નાગરિકોને રિઅલ ટાઈમ પાર્કિંગ ડેટા અને અપડેટ ડિજિટલ પ્લેટફોર્મથી પુરા પાડશે.

-નિર્ધારીત પાર્કિંગ સ્થળોએ ઓટોમેટીક નંબર  પ્લેટ રેકગ્નાઈઝેશન અને બુમ બેરીયર ટેકનોલોજી દ્વારા ઓટોમેટેડ એન્ટ્રી, એકઝિટ અને એનફોર્સમેન્ટ પુરા પડાશે.

-ખાલી વાહન પાર્કિંગની જગ્યાઓ તરફ વાહન ચાલકોને નિર્દેશ આપી ટ્રાફિક અને પ્રદૂષણમાં ઘટાડો થઈ શકશે.