ઠંડી 'ભૂલાઈ' : 8 શહેરોમાં 18 ડિગ્રીથી વધુ તાપમાન, અમદાવાદમાં સામાન્યથી 6 ડિગ્રી વધુ

Ahmedabad Weather News : અમદાવાદના લઘુતમ તાપમાનમાં સતત વધારો થઈ રહ્યો છે. ગત રાત્રિના 21 ડિગ્રી સાથે સરેરાશ લઘુતમ તાપમાનમાં સામાન્ય કરતાં 6 ડિગ્રીનો વધારો નોંધાયો હતો.

છેલ્લા એક સપ્તાહથી અમદાવાદમાં લઘુતમ તાપમાનનો પારો 16 ડિગ્રીથી વધુ નોંધાઇ રહ્યો છે. જેમાં છેલ્લા પાંચ દિવસમાં તાપમાન પાંચ ડિગ્રી જેટલું વધી જતાં ઠંડી. જાણે ગાયબ જ થઈ ગઈ છે. હવામાન વિભાગની આગાહી અનુસાર આગામી પાંચ દિવસ અમદાવાદનું તાપમાન 19 ડિગ્રીની આસપાસ જ રહે તેવી સંભાવના છે. 

હવામાન નિષ્ણાતોના મતે પાંચમી ડિસેમ્બર બાદ અમદાવાદમાં ઠંડીનું પ્રમાણ વધી શકે છે. દરમિયાન ગત રાત્રિના 13.8 ડિગ્રી સાથે નલિયામાં સૌથી નીચું તાપમાન નોંધાયું હતું. રાજ્યમાંથી અન્યત્ર ભુજમાં 19, રાજકોટમાં 18, અમરેલીમાં 19.2, ગાંધીનગરમાં 20.8, ભાવનગરમાં 21, વડોદરામાં 21.2, સુરતમાં 22 ડિગ્રી સરેરાશ લઘુતમ તાપમાન નોંધાયું હતું.