તાપીના ડોલવણમાં મેઘરાજાની ધડબડાટી, 6 ઈંચ વરસાદ ખાબકતાં જળબંબાકાર, નદીઓ બે કાંઠે

Rain in Tapi: હવામાન વિભાગની આગાહી મુજબ ગુજરાતમાં વરસાદનો વધુ એક રાઉન્ડ શરૂ થઈ ગયો છે. આજે વહેલી સવારે 6 થી 10 વાગ્યા સુધીમાં રાજ્યના 63 તાલુકામાં વરસાદ નોંધાયો છે. ખાસ કરીને દક્ષિણ ગુજરાતમાં મેઘરાજાએ ધડબડાટી બોલાવી છે, જેના કારણે જળબંબાકારની સ્થિતિ સર્જાઈ છે.

તાપીના ડોલવણમાં 6 ઇંચ વરસાદ

આજે સવારે નોંધાયેલા વરસાદમાં સૌથી વધુ વરસાદ તાપી જિલ્લાના ડોલવણ તાલુકામાં પડ્યો છે, જ્યાં માત્ર 4 કલાકમાં 6 ઇંચ જેટલો વરસાદ ખાબક્યો છે. આ ભારે વરસાદને કારણે તાપી જિલ્લાની નદીઓ જેવી કે અંબિકા, ઓલણ અને પૂર્ણા નદીઓ બે કાંઠે વહેતી થઈ છે, જેના પરિણામે નીચાણવાળા વિસ્તારોમાં પાણી ભરાતા લોકોને ભારે હાલાકીનો સામનો કરવો પડી રહ્યો છે.

સવારે 6 વાગ્યાથી 10 વાગ્યા સુધીના વરસાદના આંંકડા

છેલ્લા 24 કલાકમાં 148 તાલુકામાં મેઘમહેર

આ ઉપરાંત, છેલ્લા 24 કલાકના વરસાદના આંકડા જોઈએ તો, રાજ્યના 148 તાલુકાઓમાં વરસાદ વરસ્યો છે. જેમાં સૌથી વધુ સુરતના ઉમરપાડામાં 7.48 ઈંચ વરસાદ નોંધાયો છે. આ ઉપરાંત, 22 તાલુકાઓમાં 2 ઇંચથી વધુ વરસાદ પડ્યો હોવાનું હવામાન વિભાગ દ્વારા જણાવાયું છે. આગામી દિવસોમાં પણ રાજ્યના કેટલાક ભાગોમાં ભારે વરસાદની આગાહી છે, જેના પગલે તંત્ર દ્વારા એલર્ટ પણ જાહેર કરવામાં આવ્યું છે.