ટેન્કરચાલકે ત્રણ વાહનોને ટક્કર મારતા બે ના સ્થળ પર જ મોત

 વડોદરા,છાણી નજીક જી.એસ.એફ.સી. બ્રિજ ઉતરતા સ્ટિયરિંગ પરનો કાબૂ ગુમાવનાર ડ્રાઇવરે ત્રણ વાહનોને  ટક્કર મારી હતી. અકસ્માતમાં બે વ્યક્તિઓના સ્થળ પર જ કમકમાટીભર્યા મોત થયા છે. જ્યારે અન્ય ૯ લોકોને ઇજા થતા સારવાર માટે હોસ્પિટલમાં દાખલ કરવામા ંઆવ્યા છે.

 પોલીસ સૂત્રો દ્વારા મળતી માહિતી મુજબ, આજે સાંજે એક ટેન્કર છાણી નજીક જી.એસ.એફ.સી. બ્રિજ ઉતરી રહ્યું હતું. તે દરમિયાન અચાનક ડ્રાઇવરે કાબૂ ગુમાવતા ટેન્કર ધડાકાભેર આગળ જતી રિક્ષામાં અથડાઇ  હતી. જેના પગલે રિક્ષા પલ્ટી ગઇ  હતી અને તેનો ખુરદો બોલી ગયો હતો. ત્યારબાદ પણ ટેન્કર અટકી નહતી અને આગળ જતા એક ટેમ્પો અને મોપેડને  પણ ટક્કર મારી હતી. અકસ્માતના પગલે લોકો ટોળે વળ્યા હતા. રિક્ષામાં ફસાયેલા મુસાફરો અને ડ્રાઇવરને બહાર કાઢવાની કામગીરી કરી હતી. ટેન્કરના ડ્રાઇવરને લોકોએ ઝડપી  પાડયો હતો. 

બનાવની જાણ છાણી  પોલીસને કરવામાં આવતા પી.આઇ. આર.એલ.  પ્રજાપતિ અને પોલીસનો કાફલો ઘટના સ્થળે દોડી ગયો હતો. પોલીસે ટોળા વિખેરી ટ્રાફિક સામાન્ય કરાવ્યો હતો. અકસ્માતમાં રિક્ષા ચાલક અને રિક્ષામાં બેેઠેલા  મુસાફર સહિત બે ના ઘટના સ્થળે જ મોત થયા છે. જેમના નામ ભાઇલાલભાઇ અને મુકેશ પરમાર છે. જ્યારે  ઘાયલ ૯  લોકોેને સારવાર માટે સયાજી હોસ્પિટલમાં લઇ જવામાં આવ્યા હતા. 

અકસ્માત કઇ રીતે થયો, તેની તપાસ શરૃ

વડોદરા,

અકસ્માત કઇ રીતે થયો , તે અંગે છાણી  પોલીસે તપાસ હાથ ધરી છે. પી.આઇ.એ જણાવ્યું હતું કે,એકસ્માત કરનાર  ડ્રાઇવરથી બ્રેક નહીં વાગતા અકસ્માત થયો હોવાનું તેણે જણાવ્યું છે. ટેન્કરમાં પાણી ભરેલું હતું અને ટેન્કર છાણીથી વાસદ  તરફ જઇ  રહ્યું હતું.અકસ્માત અંગે ગુનો દાખલ કરી ડ્રાઇવર સામે પોલીસે કાર્યવાહી હાથ ધરી છે.

સયાજી હોસ્પિટલમાં ઇજાગ્રસ્ત ૯  લોકો સારવાર હેઠળ

વડોદરા,

(૧) દિપ્તીબેન ચેતનભાઇ પટેલ, ઉં.વ.૩૮ (રહે. રામપાર્ક સોસાયટી,રણોલી), માથામાં ઇજા

(૨) પ્રિયાબેન કુનાલભાઇ ચુનારા, ઉં.વ.૩૦ (રહે. નાના મોસમપુરા,ખંભાત), બંને પગ અને ચહેરા  પર ઇજા

(૩)અક્શય નરેન્દ્રભાઇ દંતાણી,ઉં.વ.૧૫ (રહે.ખંભાત), ચહેરા પર ઇજા

(૪) સચિન ધુરાભાઇ ચુનારા, ઉં.વ.૪૫ (રહે.અંબિકા સોસાયટી,ખંભાત) છાતી અને હાથ,પગ પર  ઇજા

(૫) શીવમ નિકુંજભાઇ ચુનારા, ઉં.વ.૧૩ (રહે. નાની ચુનારાવાડ, ખંભાત), નાક અને જમણા ખભે ઇજા

(૬) સંજય સુરમાભાઇ ચુનારા, ઉં.વ.૪૨ (રહે. મટી ચુનારાવાડ, ખંભાત), માથા,હાથ અને પગે ઇજા

(૭)કોકીલાબેન શૈલેષભાઇ ચુનારા, ઉં.વ.૫૨ ( રહે. મહાદેવની ચાલી, ખંભાત), જમણા હાથે ઇજા 

(૮) કૈલાસ સચિનભાઇ ચુનારા,  ઉં.વ.૪૨ (રહે.મહાદેવની ચાલ, ખંભાત) , ડાબા પગે ઇજા 

(૯) ચંપાબેન દિપકસિંહ પરમાર, ઉં.વ.૪૨ (રહે. શંકરપુરા, અણખોલ ગામ), ખભા અને જમણા કાંડા પર ઇજા