સુરતમાં SMCના વેસ્ટેજ કલેક્શન વાહનની અડફેટે 20 વર્ષીય સ્ટેટ લેવલ રનરનું કરુણ મોત

Surat Accident : રાજ્યમાં અવારનવાર અકસ્માતની ઘટના સામે આવતી હોય છે. અમદાવાદમાં થોડા સમય પહેલાં મનપાની કચરાની ગાડીએ  રાહદારીને અડફેટે લેતા ઘટનાસ્થળે મોત નિપજ્યું હતું. ત્યારે હવે સુરતમાં પણ આવી જ ઘટના સામે આવી છે. જેમાં સુરતના પનાસ વિસ્તારમાં મનપાની કચરા ગાડીની અડફેટે 20 વર્ષીય સ્ટેટ લેવલ રનર વિધિ કદમનું કરુણ મોત નીપજ્યું છે. આ અકસ્માત ત્યારે થયો જ્યારે વિધિ કદમ મોપેડ પર સવાર થઈને જીમ જઈ રહી હતી.

શું હતી ઘટના? 

પ્રાપ્ત માહિતી અનુસાર 19 વર્ષીય વિધિ કદમ સ્ટેટ લેવલ રનર તરીકે ઓળખાતી હતી અને તે નિયમિત રીતે ફિટનેસ માટે જીમ જતી હતી. આજે વહેલી સવારે તે પનાસ વિસ્તારમાંથી પોતાના મોપેડ પર પસાર થઈ રહી હતી, તે દરમિયાન સુરત મનપાના કચરાના ટેમ્પો ચાલકે તેને બેફામ રીતે ટક્કર મારી હતી. ટક્કર એટલી જોરદાર હતી કે વિધિ કદમ મોપેડ પરથી નીચે પટકાઈ અને તેને ગંભીર ઈજાઓ થતા તેનું ઘટનાસ્થળે જ મોત નીપજ્યું હતું.

આ ઘટનાની જાણ થતાં જ ખટોદરા પોલીસ તાત્કાલિક ઘટનાસ્થળે પહોંચી હતી અને કાયદેસરની કાર્યવાહી હાથ ધરી હતી. પોલીસે કચરા ગાડીના ચાલકને ઝડપી પાડીને વધુ તપાસ હાથ ધરી છે. આ દુર્ઘટનાના પગલે વિધિના પરિવારમાં અને સમગ્ર શહેરમાં શોકનું મોજું ફરી વળ્યું છે. સ્ટેટ લેવલની પ્રતિભા ધરાવતી યુવતીનું આ રીતે કરુણ મોત થવાથી રમતગમત જગતમાં પણ ગમગીની છવાઈ ગઈ છે.

ગુજરાતની એથ્લીટ

વિધિ કદમ ગુજરાતની એક એથ્લીટ છે અને તે સ્ટેટ-લેવલ રનર છે.તેણે 66મી U-19 સ્કૂલ નેશનલ ગેમ્સમાં ભાગ લીધો હતો, જ્યાં તેણે અન્ય ત્રણ એથ્લીટ - કાજલ વાજા, કુમકુમ રામાણી અને સુમિતા માલવી - સાથે 4x100m રિલે ટીમમાં બ્રોન્ઝ મેડલ જીત્યો હતો.

ડ્રાઇવર પાસે પાકું લાઇસન્સ નહતું

મળતી માહિતી મુજબ, સુરત મહા નગર પાલિકાની કચરાની ગાડીએ અકસ્માત સર્જ્યો તેના ડ્રાઇવર પાસે પાકું ડ્રાઇવિંગ લાઇસન્સ પણ નહતું. તે લર્નિંગ લાઇસન્સ પર જ મનપાનો ટેમ્પો ચલાવતો હતો. જોકે, આ મામલે પાકું ડ્રાઇવિંગ લાઇસન્સ ન હોવા છતાં તે ડ્રાઇવરની નોકરી કેવી રીતે કરતો હતો તે મોટો પ્રશ્ન છે. હાલ આ મામલે પોલીસે વધુ તપાસ હાથ ધરી છે.