ઉનાળું વેકેશન પૂર્ણ : આજથી શાળાઓમાં શૈક્ષણિક સત્રનો પ્રારંભ

- શાળા શરૂ થતાં જ સ્ટેનશરીની દુકાને વિદ્યાર્થી-વાલીઓની ભીડ જામી 

- 35 દિવસીય વેકેશન બાદ આજથી શહેર-જિલ્લાની 1500 શાળાના પરિસર બાળ કલરવથી ગુંજી ઉઠશે 

સમગ્ર રાજ્યની સાથોસાથ ભાવનગર શહેર અને જિલ્લાની શાળાઓમાં ગત તા.૪મે થી ૩૫ દિવસીય ઉનાળું વેકેશનનો પ્રારંભ થયો હતો. સતત ૩૫ દિવસ સુધી ચાલેલાં ઉનાળું વેકેશન દરમિયાન વિદ્યાર્થી-વાલીઓએ સ્થાનિકથી લઈ વિવિધ ફરવાલાયક સ્થળોની મુલાકાત લઈ વેકેશનની મોજ માણી હતી. તો, આ સમય દરમિયાન શહેર અને જિલ્લામાં વિવિધ શૈક્ષણિક-સામાજિક-સ્વૈચ્છીક સંસ્થાઓ દ્વારા અનેકવિધ નવા વિચારો સાથેના સમર કેમ્પ સહિત વિદ્યાર્થીઓમાં રહેલી કલાને મંચ પુરૂં પાડતાં અનેકવિધ કાર્યક્રમો યોજાયા હતા. ૩૫ દિવસીય ઉનાળું વેકેશન આજે પૂર્ણ થતાં આવતીકાલ તા.૯ને સોમવારથી નવા શૈક્ષણિક સત્રની શરૂઆત થશે. આ સાથે જ ભાવનગર શહેર અને જિલ્લામાં આવેલી સરકારી અને ખાનગી મળી ૧૦૨૦ પ્રાથમિક શાળાઓમાં અભ્યાસ કરતાં અંદાજિત ૩.૩૫ લાખ બાળકો તથા ૯ હજાર શિક્ષકો તથા ૪૨૦ જેટલી માધ્યમિક અને ઉચ્ચતર માધ્યમિક (હાઈસ્કૂલ) શાળાઓ તથા તેના ૨૮૦૦ શિક્ષકો શિક્ષણ કાર્યમાં રત જોવા મળશે. જયારે, આગામી તા.૧૮થી શહેર અને જિલ્લામાં શાળા પ્રવેશોત્સવની ઉજવણી થશે. જો કે, સોમવારથી શાળાઓ શરૂ થવાની હોવાથી તેની પૂર્વ સંધ્યાએ આજે શહેર અને જિલ્લાના મુખ્ય તાલુકા મથકોએ સવારથી જ વિદ્યાર્થી-વાલીઓની સ્ટેશનરીની દુકાને ભેરે ભીડ જોેવા મળી હતી. 

17 મીથી યુનિ.માં નવા શૈક્ષણિક સત્રનો પ્રારંભ થશે 

પ્રાથમિક અને માધ્યમિક-ઉચ્ચતર માધ્યમિક શાળાઓની જેમ યુનિ. સંલગ્ન-સંચાલિત કૉલેજ ભવનોમાં પણ ઉનાળું વેકેશન શરૂ થયું હતું. જે આગામી તા.૧૬ને સોમવારના રોજ પૂર્ણ થશે અને આગામી તા.૧૭ને મંગળવારથી સ્નાતક અને અનુસ્નાતક અભ્યાસક્રમોમાં શૈક્ષણિક કાર્યનો પ્રારંભ થશે.ઉલ્લેખનિય છે કે, હાલ સ્નાતક અભ્યાસક્રમોમાં પ્રવેશ કાર્યવાહી શરૂ છે જયારે, અનુસ્નાતક અભ્યાક્રમોમાં પ્રવેશ માટે રજિસ્ટ્રેશનની કાર્યવાહી ચાલી રહી છે.