વડોદરાઃ શહેરમાં બેફામ વાહનો ચલાવતા ચાલકોને કારણે ફૂટપાથ પર પણ સુરક્ષા રહી નથી.દિવાળી દરમિયાન વિશ્વામિત્રી રોડ પર શ્રમજીવી પરિવાર પર કાર ચઢાવી દેવાના બનાવ બાદ અટલ બ્રિજ ઊતરતી વખતે ફૂટપાથ પર ઊભેલી એક વિદ્યાર્થિનીને લક્ઝરી બસે ટક્કર મારી હોવાનો બનાવ બન્યો છે.
અટલાદરાના વિસેન્ઝા ખાતે રહેતા પરાગભાઇ ધારકરે પોલીસને કહ્યું છે કે,ગઇ તા.૧૧મીએ સાંજે ૭.૩૦ વાગે મારી ૧૫ વર્ષીય પુત્રી ટયુશનેથી છૂટીને તેની માતાની રાહ જોતી યોગા સર્કલ પાસે ફૂટપાથ પર ઊભી હતી.
આ દરમિયાન બ્રિજ પરથી ઊતરતી અંબિકા ટ્રાવેલ્સની બસના ડ્રાઇવરે તેને ટક્કર મારતાં મારી પુત્રીને કમરમાં ફ્રેક્ચર થયું હતું. લોકો ભેગા થઇ ગયા હતા અને મારી પુત્રીને સિવિલ હોસ્પિટલમાં લઇ જવાઇ હતી.અકોટા પોલીસે આ અંગે બસ ડ્રાઇવર સામે ગુનો નોંધ્યો છે.
