Ahmedabad News: ગુજરાતમાં બેદરકારીભર્યા ડ્રાઇવિંગના કારણે નિર્દોષ નાગરિકો રસ્તા પર જીવ ગુમાવી રહ્યા છે. ગુજરાત રોડ સેફ્ટી ઓથોરિટી'ના અહેવાલમાં રાજ્યમાં હિટ એન્ડ રનની ઘટનાઓનો એક ચિંતાજનક ચિતાર સામે આવ્યો છે. આ સત્તાવાર આંકડાઓ દર્શાવે છે કે, વાહનચાલકોની ઘોર બેદરકારીને લીધે હિટ એન્ડ રનના કિસ્સા વધ્યા છે. વર્ષ 2024 માં જ હિટ એન્ડ રનમાં 1090 લોકોએ જીવ ગુમાવ્યાં હતાં.
ગુજરાતમાં કુલ અકસ્માતમાં 14 ટકા હિટ એન્ડ રનની ઘટના, મૃત્યુદર ૫૯ ટકા : ચિંતાજનક ચિત્ર
રિપોર્ટ અનુસાર, ગુજરાતમાં થતા કુલ રોડ અકસ્માતોમાં ૧૪ ટકા માત્ર હિટ એન્ડ રનની ઘટનાની છે. આ પ્રકારના અકસ્માતોમાં વાહનચાલક અકસ્માત સર્જીને પીડિતને મદદ કરવાને બદલે ઘટનાસ્થળેથી ભાગી છૂટે છે, જેના કારણે ઘાયલોને સમયસર સારવાર મળતી નથી. ગુજરાત રોડ સેફ્ટી ઓથોરિટીના અહેવાલ મુજબ, વર્ષ 2024 માં હીટ એન્ડ રનના કુલ 1902 ઘટના બની હતી જેમાં 1090 લોકોના મૃત્યુ થયા હતા. 883 ને ગંભીર ઇજા જ્યારે 343 ને નાની મોટી ઇજા થઈ હતી.
મૃત્યુદર ખુબ જ ઊંચો
આ અહેવાલમાં સૌથી વધુ ચોંકાવનારી બાબત એ સામે આવી છે કે, હિટ એન્ડ રનની ઘટનાઓમાં મૃત્યુદર 59 ટકાથી વધુ છે. આનો સીધો અર્થ એ થાય હીટ એન્ડ રનના ઘાયલ મોટાભાગે મોતને ભેટે છે. ગુજરાતમાં હીટ એન્ડ રનના કિસ્સા ચિંતાજનકહદે વધી રહ્યાં છે. નિષ્ણાતોના મતે, સીસીટીવી કેમેરાનું નબળું નેટવર્ક અને રાત્રિના સમયે હાઇવે પર અપૂરતી પોલીસ પેટ્રોલિંગને કારણે બેફામ રીતે વાહન હંકારવામાં આવે છે. જેના લીધે અકસ્માત કરીને વાહનચાલક સરળતાથી ફરાર થઈ જાય છે. રોડ સેફ્ટી વિભાગે આ ચિંતાજનક સ્થિતિને કાબૂમાં લેવા માટે કડક કાયદાકીય પગલાં અને સઘન ચેકિંગની ભલામણ કરી છે.
ગુજરાતમાં હિટ એન્ડ રનના કિસ્સા
હિટ એન્ડ રનની ઘટના : 1902
મૃત્યુ : 1090
ગંભીર ઇજા : 883
સામાન્ય ઇજા : 343
