VIDEO| છોટા ઉદેપુર: કોલીયાથોર ગામે ખેતીની આડમાં ગાંજાનું વાવેતર, 78 લાખના જથ્થા સાથે માલિકની ધરપકડ

Chhota Udepur News: છોટા ઉદેપુર જિલ્લા સ્પેશિયલ ઓપરેશન ગ્રૂપ (SOG)ની ટીમે નશીલા પદાર્થોના વેપલા પર મોટો પ્રહાર કર્યો છે. છોટા ઉદેપુરના રાઠ વિસ્તારમાં આવેલા કોલીયાથોર ગામે એક ખેતરમાંથી વનસ્પતિજન્ય ગાંજાના મસમોટા જથ્થો ઝડપી પાડવામાં આવ્યો છે. પોલીસે રૂ.78.15 લાખની કિંમતનો 156 કિલોગ્રામ ગાંજો જપ્ત કરીને કાયદેસરની કાર્યવાહી હાથ ધરી છે.

78 લાખનો ગાંજો જપ્ત

છોટા ઉદેપુર કોલીયાથોર ગામના એક ખેતરમાં અન્ય પાકની આડમાં નશીલા પદાર્થનું વાવેતર કરાયું હોવાની SOG પોલીસને ચોક્કસ બાતમી મળતા દરોડા પાડવામાં આવ્યા હતા. જેમાં પોલીસે ખેતરને કોર્ડન કરીને ઓચિંતો દરોડો પાડતા ખેતરમાં કપાસ કે મકાઈ જેવા સામાન્ય પાકની વચ્ચે વનસ્પતિજન્ય ગાંજાના લીલાછમ છોડ ઉગેલા જોવા મળ્યા હતા. પોલીસે આખા ખેતરમાંથી ગાંજાના નાના-મોટા કુલ 508 છોડ ઉખેડી લીધા હતા, જેનું કુલ વજન 156 કિલોગ્રામ જેટલું થવા જાય છે.

આ પણ વાંચો: રાશન આપનારા ડીલરો અને લાભાર્થીઓ અંગે કેન્દ્ર સરકારનો મોટો નિર્ણય, ત્રણ મોટી જાહેરાત કરાઈ

ખેતર માલિકની ધરપકડ

સમગ્ર મામલે પોલીસે ખેતરના માલિક ઉદલિયાભાઈ ભુચરાભાઈ રાઠવાની ઘટનાસ્થળેથી જ ધરપકડ કરી લીધી છે. પોલીસે 78 લાખની કિંમતનો ગાંજો જપ્ત કરી, પકડાયેલા આરોપી સામે NDPS એક્ટ (નાર્કોટિક્સ ડ્રગ્સ એન્ડ સાયકોટ્રોપિક સબસ્ટન્સ એક્ટ) હેઠળ ગુનો નોંધીને આગળની કાર્યવાહી હાથ ધરવામાં આવી છે.