ભરૂચના નેત્રંગ ગામમાં ગરબા જોવા ગયેલી મહિલાના બંધ મકાનમાંથી તસ્કરોએ રૂ.1.26 લાખની મત્તા ચોરી કરી

Bharuch Theft Case : નેત્રંગ ગામે ગરબા જોવા ગયેલ મહિલાના બંધ મકાનને નિશાન બનાવી ત્રાટકેલા અજાણ્યા તસ્કરો સોના-ચાંદીના ઘરેણા અને રોકડ મળી કુલ રૂ.1.26 લાખ ઉપરાંતની મત્તા ચોરી નાસી છૂટતા ફરિયાદના આધારે નેત્રંગ પોલીસે કાયદેસરની કાર્યવાહી હાથ ધરી હતી. 

નેત્રંગ ગામના લીમડા ફળિયામાં રહેતા સુમનબેન વીરુભાઈ વસાવાએ નોંધાવેલી ફરિયાદમાં જણાવ્યું હતું કે, ગઈ તા.1 ઓક્ટોબરના રોજ રાત્રે 11 વાગ્યાની આસપાસ મેં મકાનના આગળના દરવાજાને લોક કરી જીન બજાર ખાતે ગરબા જોવા માટે ગઈ હતી. રાત્રે 1:30 વાગ્યે પરત ઘરે જતા મકાનના વચ્ચેનો દરવાજો ખુલ્લો હતો અને મકાનના પાછળનો ભાગ ખુલ્લો રહેતો હોવાથી કોઈ વ્યક્તિ મકાનમાં પ્રવેશી હોવાની શંકા ગઈ હતી. જેથી તપાસ કરતા તિજોરીના દરવાજા અને તેના ડ્રોવર ખુલ્લા હતા. અને તિજોરીના લોકરમાંથી રૂ.1,16,300ની કિંમતના સોના-ચાંદીના ઘરેણા તથા રોકડા રૂ.10 હજાર મળી કુલ રૂ.1,26,300ની મત્તાની ચોરી થયાનું બહાર આવ્યું હતું. ઘટનાના દિવસે મારી તબિયત લથડતા ફરિયાદમાં વિલંબ થયો હતો. ઉપરોક્ત ફરિયાદના આધારે પોલીસે અજાણ્યા તસ્કર વિરુદ્ધ ચોરીનો ગુનો નોંધી કાયદેસરની કાર્યવાહી હાથ ધરી હતી.