ટર્મ પુરી થવાના છ મહિના પહેલાં ૧૯૧ કોર્પોરેટરોને SVP હોસ્પિટલમાં કેશલેસ સારવાર આપવા નિર્ણય કરાયો

  અમદાવાદ,બુધવાર,18 જુન,2025

અમદાવાદ મ્યુનિસિપલ કોર્પોરેશનની વર્તમાન ટર્મ પુરી થવાના છ મહિના પહેલા ચૂંટાયેલા ૧૯૧ કોર્પોરેટરોને એસ.વી.પી.હોસ્પિટલમાં કેશલેસ સારવાર આપવા દરખાસ્ત મંજુર કરાઈ છે.કોર્પોરેટરો હોદ્દા ઉપર હોય ત્યાં સુધી જ એસ.વી.પી.હોસ્પિટલમાં કેશલેસ સારવાર મળી શકશે.

મ્યુનિસિપલ કોર્પોરેશનમાં ચૂંટાયેલા કોર્પોરેટરોની છ મહિના પછી પાંચ વર્ષની ટર્મ પુરી થશે. થોડા દિવસ અગાઉ ઈન્દ્રપુરી વોર્ડના ભાજપના મહિલા કોર્પોરેટરનુ  અવસાન થતા હાલમાં કોર્પોરેશનમાં કોર્પોરેટરોનુ સંખ્યાબળ ૧૯૧ છે. જેમાં ભાજપના ૧૫૯, કોંગ્રેસના ૨૩, એમ.આઈ.એમ.ના છ તથા બે અપક્ષ કોર્પોરેટરો છે.કોંગ્રેસે  દાણીલીમડાના એક કોર્પોરેટરને પક્ષમાંથી સસ્પેન્ડ કર્યા છે. આ હોસ્પિટલમાં અત્યારસુધીમાં મ્યુનિસિપલ કોર્પોરેશનના કર્મચારીઓ અને પેન્શનરોને જ કેશલેસ સારવાર મળી શકતી હતી.