ડાકોરમાં પુનિત આશ્રમ રોડ પર બે મહિનાથી ગટરના પાણી રેલાયા

પ્રાથમિક સુવિધાઓથી નગરજનો વંચિત

સ્વભંડોળનો અભાવ અને ગટર લાઈનમાં નાખવાનો સામાન ન મળતા કામ થતું નથી : સેનેટરી ઈન્સ્પેક્ટર

ડાકોર નગરમાં આવેલા મુખ્ય રોડ સહિત અંતરિયાળ માર્ગો ઉબડખાબડ થઈ ગયા છે. ઠેર ઠેર ગંદકીના ઢગલાં ખડકાયેલા જોવા મળે છે. ત્યારે હવે રોષે ભરાયેલા નગરજનો સ્થાનિક વૉર્ડના કાઉન્સિલરોને લેખિત રજૂઆત કરી આક્રોશ ઠાલવી રહ્યા છે. ડાકોરમાં પુનિત મહારાજની ગાદી આવેલી છે તે પુનિત આશ્રમ રોડ પર છેલ્લા બે મહિનાથી ગટરના ગંદા પાણી ઉભરાતા સ્થાનિકોમાં ભારે આક્રોશ ફેલાયો છે. મંદિર સહિતની જગ્યાએ જવા લોકોને ગટરના પાણીમાંથી પસાર થવાની નોબત આવી છે. 

આ અંગે ડાકોર પાલિકાના સેનેટરી ઈન્સ્પેક્ટર તારક ભટ્ટે જણાવ્યું હતું કે, પાલિકામાં સ્વભંડોળ નહીં હોવાથી તેમજ જે સામાન ગટર લાઈનમાં નાખવાનો થાય છે તે મળતો ન હોવાના કારણે કામો થતા નથી.